فيه ناس ممكن تشوفنى مجنون

وفيه ناس ممكن تكون عارفه الاكله دى

وفيه ناس متكنش مفكرانى مجنون ولا حاجة وعندها فضول انها تعرف الاكله دى

وفيه ناس هتخش تشوف التوبيك وتطلع تدعى عليا

واحتمال ناس تجرب الاكله وتطلع على طول عالمستشفى

كل دة ميهمنيش :49:

كل اللى يهمنى انى اتخنقت من طعم البيض التقليدى

واللى هيوافقنى فى دة ناس كتير انا عارف :08:

بطلوا رغى كتير بقى وانزلوا شوفوا الاختراع العجيب دة :7579:

بصوا بس الاول
دة اول موضوع اكتبه عن المأكولات والكلام من دة
فا مش عارف هكون موفق ولا لا ؟

مش مهم

(( المقادير ))

- عدد ( ؟؟؟؟ ) بيض على حسب الرغبة وعدد الناس اللى هتاكل
بس انا هكتب الموضوع على عدد ( 3 ) بيض

- لو 3 بيضات مثلا يبقى عدد ( 1 ) طماطم متوسط

- شرائح بسطرمة حسب الرغبة

- قرن فلفل ( حراق ) بتاع الناس العفية
( بارد ) بتاع الناس الفافى

- معلقة زبدة او سمنة او شوية زيت



ومعااااااانا اتصال تليفونى ونقول الو ؟؟؟
اااالو شيف حسام : ممكن اعرف طريقة تحضير الفول بالكول سلو :blink:
حاااضر يا مدام فى آخر الحلقة هجاوب على حضرتك



الاتصالات دى هى اللى بتأكلنا عيش

المهم


(( طريقة التحضير))


تتقطع الطماطم والفلفل حتت صغيره

1- تتحط الزبدة فى الطاسة
(( بس وغلاوتكم بلاش تسيبوها كتير لحسن تولعوا فى البيت واتمسك انا ))

2- تترزغ الطماطم عالزبدة والتقليب يكون بحنيه لمدة نص دقيقة
(( عشان مية الطماطم لما هتنزل فى الزبدة هتعمل طرطشة كبيرة اوى اوى اوى ))

3- تترمى البسطرمة فى الطاسة وتتقلب بحنية برده مع الطماطم لمدة نص دقيقة

4- يتحدف الفلفل فى قلب الطاسة ويتقلب ( مش شرط بحنية )

5- (( فى اخر الموضوع هشرح رقم 5 ))

6- خلاص بقى مش فاضل غير البيض :5430:
قشر البيض يا حلو وارررررررررميه فى الطاسة على طول مع التقليب لمدة حلوة كدة

7- حطوا بقى ملح وفلفل اسود حسب الرغبة (( بس اوعوا تعطسوا فى الطبق ))

8- اكيد هيتغرف الاكل فى الطبق بقى مخلاص مبقاش فيه حاجة ناقصه



بعد ما خلصنا دة كلو بقى كدة

يتاخد الطبق ويترمى من الشباك :blink:



نيجى نشرح رقم (( 5 )) عشان الاكله تزداد حلاوة
تتجاب شريحة (( جبنه تركى ))
وتتقطع حتت صغيرة عزن ( نفرض ) انكوا بتعملوا بيتزا



ملحوظة (( يمكن استبدال البسطرمة ببلوبيف ))
ويمكن الاستغناء عنهم لو مش موجودين فى البيت يعنى
(( اللى هيسألنى عن السجق هقله انا مجربتهوش عشان كدة يبقى عك بقى ))


بس خلاص مفيش كلام تانى يتقال غير " ربنا يستر "












جربوا وادعوا عليا ..