بجد زهقت واعصابي تعبت من الكابوس اللي اسمة المدارس التجريية ارجوكم ساعدوني

**ميرو2000** · 03-09-2009, 03:15 AM

انا مستنية تنيجة تنسيق المرحلة لتانية لرياض الاطفال بالمدارس التجريبية والي الان مفيش جديد كل ماتصل لسه لسه خليكي متابعة افضل لامتي اتابع والمدارس خلاص شهر وتدخل وابني عنده 5سنوات في اول اكتوبر يعني لوراحت السنة ديه هوديه فين السنة الجاية وهيكون عمره 6سنوات وطبعا السة ديه حتي المدارس الخاصة قفلت باب التقديم ارجوكم اللي عنده اي معلومة جديدة يفيدنا

**محمود التهامي** · 03-09-2009, 03:52 PM

والله يا ميرو عنوان الموضوع خضني
بس براحه على نفسك شوية
لو هتعملي كدا عشان تنسيق ابتدائي طيب هتعملي ايه في التنسيق الجامعي ان شاء الله
وبعد اذنك يعني ... هي ايه المشكلة لما ابن حضرتك يدخل المدرسة 6 سنين
انا اختي لما دخلت المدرسة بس كانت حكومي مش خاص ولا تجريبي كانت 7 سنين الا 5 ايام لانها مواليد 5 اكتوبر شوفي الذل بقا
يعني اتأخرت سنة بحالها عشان 5 أيام
هدي اعصابك وريحي بالك شوية واللي ربنا عايزه هيكون

**ميرو2000** · 03-09-2009, 11:38 PM

والله المشكلة انه بسبب التأخير ده مش هيدخل مدرسة خاصه هضط ادخله حكومي لان 6سنوات السنة الجاية يعني لا هيقبل في تجريبي ولا خاص وانا بصراحة مش عايذه ادخله مدرسة حكومي والله العنوان اللي كتبته ده فعلا اللي حاسه بيه من كتر الانتظار لان كل الادارت التانية ظهرت الا ادارة 6 اكتوبر واما تسأل يقولو اصل ده خطأ من الموظفين عشان عملو تنسيق المرحلة الاولي غلط ده غير ان لو النتيجة ظهرت قدمنا اسبوع لسداد المصروفات ولو مسددتش يروح عليه مكانه طب افرض احنا عدينا اسبوع ومسألناش لاننا زهقنا من الانتظار يبقي خلاص ولا نعرف حاجه بجد اللي بيحصل ده مش طبيعي واسفة للاطالة وشرا علي الرد

**محمود التهامي** · 04-09-2009, 12:28 AM

والله المشكلة انه بسبب التأخير ده مش هيدخل مدرسة خاصه هضط ادخله حكومي لان 6سنوات السنة الجاية يعني لا هيقبل في تجريبي ولا خاص

حضرتك متأكدة من المعلومة دي ؟؟

أنا اعرف انه فيه حد أدنى للقبول اللي هو في الغالب بيكون 5 سنين و 6 شهور
لكن هو فيه حد أقصى ؟؟؟
ياريت حضرتك تتأكدي من الموضوع دا

**om sohaila** · 04-09-2009, 12:36 AM

اهلا يا ميرو
منورة المنتدى يا قمر
شوفى يا حبيبتى الحال من بعضة
انا عالطول تلاقينى هناك فى الادارة التعليمية
انا كمان بنتى عندها 5 و 21 يوم
يعنى السنة الجاية مش هتقبل
و اعصابى مدمرة و الله زيك
لان اختها فى تجريبى و حرام تبقا اقل منها و لو دخلتها خاصة يا ستى عشان يقبلوها عيزينى ادفع السنتين مع بعض يعنى 12000 جنية
يعنى لا طايلة سما و لا ارض

المهم ان شاء الله المرحلة التانية هتظهر الاحد البعد الجاى
لان دخلو 10 فى المية زيادة على المرحلة الاولى
و بقا التنسيق الحد الادنى 5 سنين و 2 شهر و 16 يوم
و قلتلهم دى المرحلة التانية قالولى لا ب س لقوا عجز فى المدارس فكملوا المرحلة الاولى
يعنى تهريج
الادارة اللى فى السادس لا يفقهوا اى شيء فى اى شيء
فبروح الادارة التعليمية اللى فى الشيخ زايد

على العموم واحد ولى امر لقيتة بيجمع اسامى الاولاد الصغيرين اللى زى اولادنا و اخد ارقام تليفونتا و قال عشان نعمل تظلم جماعة
يعنى العيال ما قبلوش السنة دى و لا هيقبلوا السنة الجاية لانهم عدوا السن
يبقا اية يترموا فى الشارع

لو كدا انا هقولك باذن الله عالطول

انا رغيييت كتير
استحملينى ههههه
بس مقهورة و الله

دمتى بامان الله