صهيبة:أنا نفسى أعيش ... هل هو سوق عبيد؟ ولا عمل خيري لوجه الله؟!!

[خلود]

_-_-_-_-_-_-_-_-_-_-_-_-_-_-
كترت فى الأعوام الاخيرة استخدام الأطفال فى الاعلانات للمستشفيات و المراكز و الجمعيات الخيرية
بشكل كبير اوى
مستشفى سرطان الاطفال 57357
و مركز د/مجدى يعقوب للقلب بأسوان
ومعهد الكبد و معهد ناصر
و جمعية رسالة و مصر الخير و الأورمان و بنك الطعام و غيرهم
و دى صهيبه اللى الـ 80 مليون اكيد اتمنوا يدوها قلبهم عشان تعيش
و غيرها اسماء و شهد و عمر ووووو


بقو بيركزو على حَس الشعور العام الانسانى و العاطفى للناس
و بيستخدموا فى كده أطفال الواحد لما بيشوفهم بيتمنى انه يقطع من جسمه و يعطى لهم
و بيعرضوها بأسلوب احترافى يحرك المشاعر و يهز الأفئدة
لكككككككككككن

استخدام الأطفال فى الاعلانات الخيرية دى

هل دا سوق عبيد جديد؟
هل هو انتفاع بأطفال برءاء ؟
هل هو عمل طيب طالما أن هدفه الخير لهم ولمن مثلهم؟
هل تصدق أن هذه الاعلانات هدفها خيري فعلاً ؟
هل تصدق أنهم أطفال مرضى حقيقيون ام انهم ديكور و ممثلين ؟
و ان كانو حقيقيين فلماذا كلهم مشاء الله خلقتهم جميلة و بريئة و ليست كمثل من نراها فى الواقع ؟
هل فعلا هذه المستشفيات تستقبل كل الحالات حتى الفقيرة منها و اللى معندهمش واسطة ؟

صدقونى معنديش اجابات على الأسئلة دى و خاطرى بيجادلنى فيها

إلا انى كل ما بيجى اعلان

;نفسى أعيش - صهيبة فاروق
نفسى شعرى يبقا طوييييل
نسى
نسى
نفسى فى لعب كوتيييييييير
عايز آكل كششششرى
نفسى اتصور مع ابو تريكة

أنا نفسى أعيش

لما بيتعرض بجرى اتفرج عليه و لو حتى كنت فى الحمام
بعتبره اعلان فى فكرته ناجح جداً بل أنجح اعلان من أيام اعلان ( عبد الرحيم عمرو و حتتجوز و الشمعدان )
لكن بعد ما بتفرج عليه و قلبى يتقطع على صهيبة و اللى زيها و ليه مش زي الاطفال اللى قبلها و ليه مش طفله عادية مشفية
برجع و اقول و ايه ذنب صهيبه فى كده ليه يعملوا فيها كده
لما تكبر بإذن الله هل دا عادى بالنسبة لها و كأنها بتضحى بنفسها عشان غيرها
و لا دا استخدام لشعور طفلة لسه مش عارفة يعنى ايه كلمة كرامة

ولا طالما ان الهدف أسمى و أرفع و أحسن من المحتوى فلا مانع طالما ان الفائدة تعم؟


بزعل اوى بعد الاعلانات دى على حال الأطفال و على حال البلد اللى بقت كلها
شحاته علنية فى الخير
او شحاته مستخفية فى الاتصالات و نصبهم
او شحاته مستفزة فى الشيكولاتات و السلع الترفيهية
و شحاته ساب الزمالك

انا احترت اوى و مش عارفه انا ساخطه على استخدام الاطفال دول
و لا انا راضىه عن استخدامهم لان الفايدة اكبر من المعروض

بحاول اتجاوز الشك ده الى اليقين فى ان استخدام الاطفال دول عادى طالما انها هتساعد غيرهم
بس برجع و اقول ذنبهم ايه

فهل فعلاً حيرتى دى هلاقيها عند حد فيكم ؟؟؟؟!!!
؟؟؟؟؟؟؟؟؟؟
الموضوع مفتوح للحوار العام أو الرد على الأسئلة اللى فى الاول
براحتكم

و فوق كل ده و بعد كل ده يجب ان نسأل الله تعالى لهم الشفاء
و للمقيمين عليهم الهداية و الرشاد و حسن السداد
و ان يعفينا و اطفالنا من كل سوء

[fagrmasr01]

نسأل الله تعالى لهم الشفاء وللقائمين عليهم الهداية و الرشاد و حسن السداد وان يعفينا واطفالنا من كل سوء

بصراحة
إنتشار هذه الاعلانات دليل على ما تعانيه مصر من الفقر والسرقة والفساد
ويكفى كتاب جمال الشاعر اللى كتبه وسماه أنا مش عبيط .. وفضح فيها ما تتم سرقته فى مستشفى 57357
وفين مسئولية البلد .. وفين المراقبين .. وفين نحمل الخير لمصر!!!

[اميرة حبى انا]

اولا انا مش مع استخدام الاطفال بالشكل ده فى الاعلانات لانها بجد حاجة توجع القلب
وربنا يشفيهم ويشفى جميع مرضى المسلمين
آمين
وبالنسبة للسرقة بقى دى كلمة عادية فى بلدنا
بمعنى
اننا بقينا نسمعها وكأننا بنسمع عبد الحليم حافظ
حاجة تقرف