روبابيكااااا .... أى حاجة قديمة للبيع

**اميرة حبى انا** · 17-01-2010, 09:24 AM

روبابيكيا

أى حاجة قديمة للبيع
حد من أصحابنا فى المنتدى عايز يبيع حاجة
طب حد عايز يشترى حاجة قديمة من زمان

طبعا الكل مستغرب ايه اللى انا بقوله ده

دى فكرة موضوع جديد

كلنا عارفين طبعا إن بياع الروبابيكا بيشترى القديم
وبرده وبيبيع القديم

بس لو أنت أو أنتِ
عدا عليكم بياع الروبابيكا ممكن تبيع له ايه
ممكن تبيع له لحظة ... ذكرى مؤلمة .... كلمة ...ايه الحاجات البيكيا اللى عندك اللى ممكن تستغنى عنها ولو استغنيت عنها هتستغنى عنها ليه ...؟؟؟

ولو أشتريت منه حاجة قديمة عفا عليها الزمان بس اشتقتلها هتشترى منه ايه ....؟؟

يلا كل واحد فيكم يعتبر بياع الروبابيكا واقف تحت بلكونته ويبيع له اللى هو عايزه أو يشترى منه
وبرده هيقولنا ليه ....

يارب الموضوع يعجبكم

**محمود التهامي** · 21-01-2010, 01:03 AM

ايه الابداع دا يا اميرة
بجد مش عارف اقولك ايه
الاول استغربت ان محدش رد على الموضوع دا
بس لما جيت اكتب عرفت ليه محدش رد
لاني دلوقتي في نفس الوضع والاحساس
وبجد بجد مش عارف اقولك ايه
ولا عارف اوصف انا حاسس بايه دلوقتي
موضوعك لمس جوايا حاجات كتير قوي
وأكيد مش أنا لوحدي اللي حسيت كدا
استني
سيبيني افكر
ابيع ايه
ابيع ايه
تصدقي فيه حاجات كتير عايزة تتباع
لأ مش عايزة
دي أحسنلها تترمي
خسارة فيها البيع
بس برضه اللي يجي من وراها فايده
وللا هي يعني هتبقا خسارة من كل ناحية

وحاجات كتير قوي وحشتني قوي واشتقتلها قوي
اشتقت لأيام ثانوي
ومدرسيني
وخصوصاً أ/ محمود مأمون ... نفسي اعرف فاكرني وللا لأ ليا زكريات كتير قوي معاه
وزمايلي
وزميلاتي بصفة خاصة هههههههههه
واحدة بس نفسي اشوفها قوي وهي طبعا عارفه نفسها
بس ياترى ممكن فيوم تشوف الكلام دا
هتبقا بشرة سارة جدا بالنسبالي لو سمعت عنها او قابلتها

اشتقت لكوبري عباس والجو هناك وزحمة العربيات بليل ونور البواخر في النيل والناس في المحلات
وشارع البحر الأعظم وانتي عارفه بقا بيودي لفين ههههههههه
وطرطشة مية الأوتوبيس النهري
وجو اسكندرية في الشتا
وخروج شلة ثانوي
وحكاوي الحب والغرام مع اصحابي من كوبري امبابة ولحد اركاديا مول

أحمد كارم
محمد فتحي
أحمد توفيق
انتوا فين

يااااااااااه يا أميرة فكرتيني بحاجات كتير قوي
طيب اعمل ايه دلوقتي
اجيب دا كله منين

**اميرة حبى انا** · 21-01-2010, 01:16 AM

معلش يامحمود
والله بجد اتأثرت جدا
كل ده جواك وساكت
عموما
ربنا يسعدك ويحققلك كل ماتتمناه

**fagrmasr01** · 21-01-2010, 01:29 AM

أفكارك دايما متميزة زيك يا اميرة

انا بئا عاوز
ابيع له ...
او حتى ارمى له ببلاش
كل المنافقين والكذابين
اللى مروا ف حياتى

واشترى منه .. لو عنده
ولو لحظة صدق

**اميرة حبى انا** · 22-01-2010, 08:06 PM

شكرا يا استاذ جمال على مشاركتك فى الموضوع
واتمنالك تلاقى الصدق فى كل مكان

الموضوع: روبابيكااااا .... أى حاجة قديمة للبيع

أدوات الموضوع

عرض