يا طيبة

**محمدفاروق** · 10-07-2011, 03:29 AM

ماتدبليش الورد ف ايدين البنات
وماتشرخيش قلب الولاد
يا طيبة...
بتكرى ليه ف احلام بنات متطرزه
بخيوط بتحلم تتغزل
بأيدين ولاد..
مستنظرين
مسحة ايديكي الطيبة
مستنظرين الطبطبة
ورغيفك المغموس بطين المصطبة
يا ام الندى
عيشك وملحك كان زمان زى العسل
ليه فجأه صار..
طعمه مرار
وايديكي بتلم النهار
وبتفرشي ف عيون ولادك ليل طويل
حاجبة بسوادك كل ضي
طارح في ضلك كل شئ اخضر جميل
ل ...ولاد......
كما حسنك جمال......متغندرين
اما الولاد نسل الفقير
اللي بيشحت فوق رغيف يومه الطويل
كام حته من حلمه البسيط
ليه يلقي من وشك عبوس؟
عمره ماطال يوم الحصاد
غير فرز سوس؟
يا ام الولاد عايشين كابوس
يا طيبة
م تبللي جوفهم برعشه من خضارك
ومتبخليش
علي كل عيل فوق رغيف يومه الطويل
لو حته من حلمه البسيط
وخضري حلم البنات
ودوبي ف مر السنين
لو حته من سكر بنات
يا ام الولاد
ما تجففيش الحلم ف ايدين الولاد
ما تدبليش الورد
ف ايدين البنات