كل سنة وانتى طيبة
~
كل سنة وإنتى
::::::::::::::::::
كل سنة وإنتى الأميرة
وإنتى البصر والبصيرة
كل سنة وإنتى
رغم الحزن..
كبيرة..
ماتستغربيش إن لسه
الحرامى حرامى
والكدب ونفس الأسامى
ما إنتى عارفة
طول عمرها الوشوش الحقيرة
حقيرة..
ماتستغربيش
من نفس السؤال
والحيرة..
عايز أقولك سر
ابنى الصغير بيحبك أوى
بس اعملى معروف
اوعى تجيبى لحد سيرة..
عايز أقولك كمان
لسه فيه ناس بتكتب شعر
وبترسم
وبتغنى
وف قلوبهم أحلام كتيرة..
كل سنة وإحنا لسه جوانا
بقايا م الفرح
ولسه قادرين نضحى
كل سنة وإنتى غنوة عشق
بتصحى فينا البنى آدمين
وبتصحى..
إوعى يا مصر يهزمك الحزن
أو تهربى
أو تقولى زهقت
وتتنحى
إوعى
اعملى معروف..
::::::::::::::::::::::
رد مع اقتباس
المفضلات