ايه هو الاصعب فى نظرك

1- انك تكون قاعد فى سايبر او بلاى ستيشن وفى عز اللعب وحلاوته يجيلك واحد رخم يقولك " الوقت خلص "

2- انك تكون بتكتب موضوع فى المنتدى بمجهودك الشخصى وبقالك ساعة بتكتب فيه وقبل ما تدوس " اعتمد الموضوع الجديد " تبص تلاقى النور قطع

3- انك تكون بتذاكر السنة كلها وشغال " دح " ومبتسبش كتاب ويوم ما تخلص امتحاناتك تيجى الوالدة تقلك " تعالى بقى ننفض عشان الناس لما ييجو يباركولك "

4- انك تكون قاعد فى لجنة امتحان ويكون واقف عليك مراقب لابس نضارة شمس ومش عارف هو بيبص فين

5- انك تكون راكب مع سواق تاكسى وتقله على مكان تلاقيه سمع غلط ووداك مكان تانى خالص

6- انك تكون ماشى فى الشارع وفيه مية فى الارض وعربية تعدى من جنبك وتغرك من اولك لاخرك

7- لما تعض لسانك وانت بتاكل

8- لما تنزل من بيتك وانت مستعجل ووانت على اول الشارع تفتكر انك نسيت الموبايل او المحفظة

9- لما تكون في المترو مروح وتلاقى نفسك عايز تخش الحمام ومزنوق زنقه سوده وتبص تلاقى نفسك لسه في المعصره وانت نازل حدائق الزيتون
او فى اسكندرية مثلا تبقى انت نازل من القطر فى المنتزة وتلاقى نفسك لسه فى سيدى بشر

10- لما تبقى قايم تشرب بالليل و يقوم صباع رجلك الصغير مخبوط فى حرف السرير

11- لما تشرب بيبسي و يجيلك كوحة و عطسة فى نفس الوقت و البيبسي يطلع من
مناخيرك

12- لما تبقى بتتمطع و كوعك يخبط فى خشبة ولا فى الشباك او حد ييجى يزغزغك

13- لما تستحمي في الشتا بميه سخنة والسخان يفصل وانت عليك صابون وتكمل بميه ساقعة

لو عندك موقف مختلف احكى عليه ومتتكسفش :005: