كبسة اللحم وبطريقتى الخاصه

**ام العيال** · 17-11-2009, 12:49 PM

السلام عليكم

كبسة ام العيال

3 كوب رز بسمتى
لحمه مسلوقه نص سلق على حسب العدد
2 بصله متوسطه مبشوره
4 جزرات مبشورين
بهارات من اللى موجوده بالبيت وحبهان وفلفل اسود
2 معلقة صلصة طماطم

الطريقه
نغسل الرز كويس وننقعه فى ميه لمدة ربع ساعه
نبشر البصل ونحطه على النار لغاية مايبقى لونه اصفر ونرمى عليه الجزر المبشور ونقلبهم شويه ونحط عليهم البهارات والتوابل وبعدها نزودهم ب 6 كوبايات شوربه من شوربة اللحمه المسلوقه وغلوتين ونزودهم بصلصة الطماطم

وبعد كده نحط الرز عليهم
ولما يغلى نهدى النار ونسيبه يستوى

اللحمه بقى ممكن نحطها معاهم
اما انا مش بفضل كده
بعملها صلصه لوحدها واحطها فيها واسيبها تتشرب من الصلصه دى
الصلصه دى عباره
5 طماطم
2 فلفله خضرا
بصله
واضربهم بالخلاط واحطهم بحله وعليهم البهارات والملح ومعلقة سمن واللحمه النص سليقه
واسيبهم يتسبكوا مع بعض
ولما تستوى اللحمه فيها بيكون طعمها جميل
عند الغرف
اغرف الرز وعليه اللحمه وشوية صلصه
وبالف هنا

طريقه سهله ولذيذه جدا
وبالف هنا وشفا

**fagrmasr01** · 17-11-2009, 01:32 PM

تسلم ايديكى
ياراعية التغذية فى منتدانا

**sharabasy** · 17-11-2009, 02:33 PM

عارفة ياام العيال بيعجبني في وصفاتك ايه؟
البساطة
بمعني ان المقادير اللي بتقولي عليها كلها متاحة في البيت
لان الاخ معاذ لما وصف كبسة الفراخ اضاف بعض البهارات الغير شائعة في بيوتنا
وبصراحة انا ما بخرجش من البيت اشتري حاجة خالص زوجي اللي بيشتري كل حاجة
فما اقدرش اقوله يلف علي الاسماءالغريبة للبهارات ده كفاية عليه شغله وشراء الحاجة
ام اياد

**اميرة حبى انا** · 18-11-2009, 12:03 AM

بجد انا دورت عليها فى النت كتير
بس كنت شايفاها صعبة
خصوصا زى ماقالت ام اياد
البهارات غير انها محتاجة ندور عليها
كمان حاسة انى مش حباها كلها
بجد سهلتيها جدا
وتستاهلى؟؟؟؟
والله مااعرف
شوفى عايزة ايه وانا اعملهولك