الذ فراخ وبطريقتى الخاصه

**ام العيال** · 28-10-2009, 10:34 PM

السلام عليكم

انا جايبالكم طريقة فراخ عملتها وطلعت خطيره فعلا
انا كنت شفتها على قناه من القنوات بس الاشكال عندى ان الشيف بعد ماتبلها حطها بالدقيق وحمرها
وانا مش بعمل حاجات محمره بالزيت لانه ضار طبعا ( المقليات عموما )
بس جربوها وهتدوقوا طعم جميل لدرجة احمد ابنى قال
دى الفراخ اللى اكلتها بشرم بالفندق

المقادير

فرخه متقطعه ارباع ونعمل شقوق بالسكينه على كل ربع
علشان الخلطه تتخلل الفرخه من جوه
بصله متوسطه
5 فصوص توم
4 طماطم
معلقة صلصه
عصير لمونه
فلفله رومى
كوب زبادى
وطبعا
ملح وفلفل وبهارات

نجيب الخلاط
ونحط فيه كل المكونات ونضربهم تمام
ونحط المكونات على الفرخه ونقلبها فيهم تمام ونحطها بالتلاجه مقدار ساعه
ونجيب كيس حرارى من اللى بينباع فى السوبر ماركت
ونجيب صينية فرن

نرص الفرخه بالتتبيله بالكيس على الصينيه ونقفله كويس ونتبع الخطوات المكتوبه على الاكياس
ونحطها بالفرن ونسيبها لغاية مانلاقيها حمرت واستوت من جوه وعملت صوص رائع جدا

لو عايزاها مقرمشه
نقطع الكيس من فوق
ونحطها تحت الشوايه شويه

وبعدها نكون عاملين طاجن رز معمر
نغرفه بطبق
وحواليه الفراخ وعلى الوش الصوص الخطير بتاعها
وبالف هنا وشفا