تعرف ايه عن الضمير ؟؟


يعني تقدر تلخصلي تعريف الضمير ده بايه ؟؟


انا ماعنديش جمل معينه تفسر الكلمه دي
لكن اللي اعرفه ان الضمير ده ان ( يبقى عندك دم واحساس
والتزام انساني) في كل حاجه بقى في الحياه....

تعالوا طيب كده نشوف ضميرنا وصل بينا لحد فين دلوقتي ؟؟

كل ولد او كل بنت بيخدعوا الطرف التاني
بإسم الحب
طرف بيقضي وقت...وطرف بيحب بجد
واحد ماعندوش ضمير
والتاني بيحب بضمير !!

البنت اللى بتكدب على مامتها وأهلها
وتنزل تقضي اليوم مع صاحبها
الام عندنا ضمير وواثقه في بنتها في التعامل
والبنت ماعندهاش دم ولا تقدير...مافيش ضمير !!



موظف حكومه من العثاثيل بتوعنا دول
مزاجه ومتعته انو يعطل مصالح الناس ويقرف فيهم
بيكون في ايده انه يخلص مصلحه اي حد بسهوووله جداً وفي ثواني
لكن بيحب دايماً يستغل الوضع ويسحب من اللي عايز يقضي
مصلحته ( اللي هي من حقه اساساً ) على قد مايقدر وخلي
عندك نظر ....
الموظف ماعندوش احساس بمسئوليه ولا ضمير
والزبون اياه لازم هيبيع ضميره عشان ينجز في مصلحته !!

بياعه الخضار البسيطه جداً اللي المفروض انها ساذجه
بتغش على قدها
يعني لو انت زي حالاتي كده مش بتفهم حاجه في الكيلو
ومش عارف شكل الكيلو ده يبقى قد ايه يبقى ممكن تديك
كيلو الا ربع...وتوفر الربع ده لنفسها...وانت على قد حالك
فرق اوي معاها الربع اللي هي وفرته لبيعه تانيه ده !!
ست مسكينه آه وشقيانه ومحتاجه القرش
باعت ضميرها وغشتك عشان القرش ده !!!

راجل فلاح بيبيع المحصول بتاعه..
.سمع ان فيه مبيدات ورش
بيخلوا المحصول يطلع بسرعه البرق ويكون شكلو تحفه
يرش الفاكهه بتاعته...ويبيعها في السوووق بسرعه نااار
والناس ياعيني يشتروا الفاكهه اللي شكلها يجنن دي !!
مع العلم ان الراجل ده بيكون شايل شويه فاكهه مش
مرشوشه لنفسه ولأسرته على جنب
الرش اللي الراجل رشه ده كله كيماويات
يعني مرض على طول !!!
هو مصر انتشر فيها الأمراض الخبيثة من شويه ؟؟؟
صاحب الفاكهه عارف انها مضره...
والدليل الفاكهه اللي مش مرشوشه
ومتشاله على جنب دي
بالعربي كده يعني
تبوظ في الناس.... في دااهيه
هو مالو !!
كل اللي يعرفو انو كسب دهب !!
باع ضميره ودينه وآدميته..قصاد الفلوس والربح !

ختامها مســــــك
بعض الرؤساء العرب باعوا ضمائرهم
وباعوا احساسهم بغيرهم
كل اللي بيحسوا بيه هو الكرسي اللي هم قاعدين عليه
ومكلبشين فيه باديهم وسنانهم ومستعدين يتقتلوا عليه
مش مهم التمن....
شعــــــــــــــــــــب كـــــــــــــامل يتــدمر
مش مشـــــــكـــــــــله
المهم الكرسي !!
يبيع البــــــلد كلـــــها
بردو مش اشكال
المهم الكرسي !!
وماادراك ماامتيازات الكرسي ده !!
هم يعني بيكلبشوا فيه من شويه ؟؟؟


المــــواقف كتيييره اوي حوالينا


لو ركزت لمده ساعه في الوضع اللي حواليك
هتلاقي الضمير ده بقى كلمه وخلاص قليل اللى فاهم معناها
اساساً للاسف


الضمير ده يشمل دينك واخلاقك وانسانيتك واحساسك..
لو ضاع او مات...خــلاص انــسى...كلو هيـــمــوت !!


وللاسف كل اللي بيبيعوا ضميرهم دول بيبيعوه عشان حاجات
فانيه كلها ومنتهيه !!





الطرف اللي بيخدع التاني في حبو ده باع ضميره عشان
يستمتع بالطرف التاني وهو بيحبه...يعني عشان متعه اللحظه
اللحظه دي هتخلص اكيد...مهما كانت سنه او اتنين..هتخلص !





البنوته اللي بتدحك على مامتها
بتدوس على ضميرها عشان الأمور بتاعها
اللي هو ممكن يرميها في اي يوم اساساً
وبتخسر ثقه اهلها اللي اكيد هيكتشفوا كدبها ده في يوم
وساعتها عمر ماثقتهم فيها هترجع تاني !!




بياعه الخضار بقى والموظف والفلاح صاحب الفاكهه
دول باعوا ضميرهم عشان ارخص واتفه حاجه في الدنيا
الفـــــــــــلوس !!
اللي هي بتتصرف في ثااانيه وانتهى الحوار على كده !!




اما بقى الرؤساء العرب دول...
باعوا ضميرهم عشان جنون السلطه والطمع والشره اللي
خلاهم مرضى نفسيين !!
الناس دي مافكرتش انهم هيموتوا في اي لحظه
ماشافوش اي حد مات واتعظوا مثلاً ؟؟
حتى لو شافوا...مش هيحسوا
ماهو مافيش ضمير...!!!



وانت بقى بعد كل ده ضميرك موجود وصاحى

ولا بقيت زيهم ضميرك الله يرحمه !!!؟