اللي اتكسر يتصلح ...ولكن........!!!

[stylooo]

ازيكم جميعا.. وكل سنة وانتو طيبين ..

كنا بنتكلم مع جماعة زمايلنا ..فالمهم كالعادة جت سيرة الكلام عن الحب وقعدنا ننقاشهم انا وأخ صاحبي ونقنعهم ان الدين مش بيقول ان الحب حرام مطلقا..
بالعكس ..ده الاسلام دين الحب ..
ولكن..الحب الحرام حرام ..والحب الحلال حلال..
هو فيه حب حرام وحب حلال ؟؟
اه طبعا..
الحب الحلال زي اعظم حب ؛ حب الله .. وحب الرسول صلى الله عليه وسلم .. وحب الابن لأمه وأبوه ..وحب المسلم لأخوه المسلم ..والملسمة لأختها المسلمة..
والحب الحرام ..زي كل العلاقات اللي بنشوفها بين الشباب والبنات دلوقتي في الجامعات وعلى النت بدون اي ارتباطات شرعية..



المهم..علشان منطولش..
الحمد لله اقنعناهم ..ولكن الاخ اللي معايا قال كلميتن هما اللي انا عامل الموضوع علشانهم..
بيقول :

( زمان ايام الواحد ما كان مقضيها وقبل ما ربنا ينعم على الواحد بنعمة الهداية والصحبة الصالحة..كنت بحب واحدة ..
وطبعا مكنتش حاطط في دماغي ان الموضوع له علاقة بالدين ولا حلال وحرام والكلام ده كله ..ولا كنت اعرف ان القلب اهم حاجة في الانسان علشان يعبد ربنا ولازم يطهر قلبه من كل حاجة حرام علشان حب الله يدخل قبله بصدق فعلا..

خلاصة الكلام..اني معرفتش قيمة الكلام ده غير بعد التوبة والرجوع ربنا ..

جاهدت كتيييير علشان اصلح قلبي ..وتعبت كتييييييير علشان انسى .. ودعيت كتير ان ربنا يملأ قلبي بحبه وحب النبي والصالحين..


وبفضل الله يمكن اكون نسيت بنسبة 99 %
ولكن ؛ في العيد الصغير اللي فات.. شفتها !!!!
للأسف..شفت البنت اللي كنت بحبها...
غضيت بصري ومشيت ..

ولكن لما روحت البيت..قلبي كان مولع نار..الذكريات كلها عماله تتصارع هي وشوية الايمان اللي في قلبي..
بحاول ادفعها ..ولكن ........صراع رهيييييييب..

يآآآآآآآآآآآآآآآه ..بعد 8 سنين ولسه القلب فيه رواسب..!!

سبحان الله..
اللي انكسر ممكن يتصلح , بس صعب يرجع زي الأول!! )



علشان كده نصيحة بقولها من قلبي لكل الناس ..
اوعى حد يقول انا هجرب ..ده الموضوع عادي ..مرة وهتعدي والسلام..

اوعوا اي بنت تستهون بالموضوع ده بالذات ..لأنه بيسيب علامة كبيييرة اوي..ان مكنش جرح كبيييييير..!!

عايزين قلوبنا تفضل (جديدة) ..ميدخلهاش غير الحب الحلال..

علشان لما حب ربنا يدخلها ويملاها ..لا تشبه شائبه..مفيش حاجة تعكره ..


زي نظرية الكوباية..
طول ما هي جديدة..حط فيها اي حاجة ...هتبقى صافية وطاهرة وجميلة..


انما لو حطيب فيها عصير مثلا..صعب تحط فيها حاجة تانية..


وحتى لو وجيت تفضيها بعد كده علشان تملاها بحاجة تانية..هيفضل على الجدار رواسب هتعكر الحاجة ومش هتخليها صافية ..





اهو هي دي قلوبنا..مش عايزين نلوثها بالحب الحرام ..علشان صعب ننضفها بعد كده..دي نصيحة للي ربنا انعم عليه ولسه مدخلش أسوأ تجربة في الحياة..تجربة الحب الحرام..

أما اللي وقع خلاص..ولكن ربنا تاب عليه ..بس للاسف مش قادر ينسى..

نصيحتي ليه..انه يغسل الكوباية الاول..
ايوه ..علشان حب الله يملأ قلبك فعلا..لازم تغسل قلبك الاول....

اغسله بدوع الندم على كل دقيقة من عمرك عصيت ربك واغضبته فيها..
اغسله بذكر الله والاستغفار ..


اغسله بالتدبر في كتاب ربنا وفي نعمه اللي تعد ولا تحصى..
وادعي بصدق ان ربنا يرزقك نعمة النسيان

..وتاكد ان ربنا هيستجيب لك ..بس انت اصدق الله يصدقك..




منقول
عن الاخ | هنعيشها صح

[fagrmasr01]

والله موضوع طيب جدا وجميل ومفيد
الله يكرمك ويبارك لك
ويجازيكى عننا خير الجزاء
اللهم اغفر لنا وعافنا واعف عنا
واملأ يارب قلوبنا بحبك وحب حبيبك رسول الله
اللهم صلى وسلم وبارك عليك ياسيدى ياحبيبى يارسول الله وعلى الك وأصحابك والتابعين
اللهم آمين

[اميرة حبى انا]

الله على موضوعك يا ستايلو فيه دعوة رائعة لكل الناس وخاصة البنات والشباب
اللهم اهدى بناتنا وشبابنا يارب
وابعد عنهم اى حرام

[فريد]

الله يكرمك ياستيلو و يبارك فيكى
و ربنا يهدينا و يهدى شباب المسلمين
الموضوع الصراحة و انا بقراه
كان فيه جذء كبير منه يخصنى
و بجد كنت حاسس بكل كلمة فى الموضوع
ربنا يكرمك
و يارب تعدى من الملحق
بس ذكرى كويس
لحسن ميس خلود مش هاترحم حد

[وردة الايمان]

موضوع فعلا جميل يا ستايلو

دعوة جميله ودرس اجمل فى الفرق بين الحب الباقى واللى بيكون السبب فى دخول الجنه

وبين الحب الفانى اللى بيكون سبب فى دخول جهنم والعياذ بالله

جزاك الله كل خير