كوابيس ولكن !!!
كوابيس مواطن غلبان بدرجة رئيس جمهورية
بقلم أحمد رشدي
المرة دى الكابوس جامد جداً وكنت هروح فيها لكن قدر اللهُ لى الحياة لأجل معلوم ومكتوب.
اتعشيت نص نص أصلى أنا لله الحمد والمنة بقضى عشائى نوم، خفيف خفيف، وتوجهت للقبلة وقعدت أفكر وقلت أذكار النوم واستعذت بالله من الشيطان الرجيم وروحت فى النوم وقال شوفت إيه تخيلوا، شوفت نفسى إنى بقيت رئيس جمهورية مرة واحدة ومش مصدق نفسى رئيس جمهورية (مواطن بدرجة رئيس جمهورية) وعلشان مش مصدق قولت أديها قرارات، قرار جمهورى.. مادة 1: يتم تعديل الدستور لأربع فترات رئاسية فقط (و محدش يسألنى أربعة، هى كده).
مادة 2: إنشاء وزارة للنظافة العامة ومدارس وكليات للنظافة وجمعيات للنظافة ونقابة للنظافة.
مادة 3: إنشاء وزارة الطعام ويكون مكتب وزير الطعام فى الشوارع والأسواق والجمعيات والمخابر.
مادة 4: القضاء على كلمة طابور من جميع القواميس وبكل اللغات وعدم السماح لمن تعارفوا أو تزاوجوا أو عملوا جمعيات أو اقترضوا أو أقرضوا أو كانت بينهم مودة أو خصومة من خلال الطوابير فى الماضى السحيق بالتواصل أو التجمع أو الحديث عن الماضى.
مادة 5: إنشاء وزارة المرور ويكون مكتب وزير المرور فى ميدان رمسيس أو ميدان لبنان أو وسط البلد أو حتى رجلين البلد، وكذلك وكلاء الوزارة فى المحافظات مكاتبهم فى الميادين.
مادة 6: إنشاء وزارة الفقراء ودى أهم وزارة ويكون وزير الفقراء حساس (يحس بحال الفقير ويكفيهم السؤال).
مادة 7: إنشاء وزارة العفة (دى وزارة فى غاية الخطورة والأهمية بمكان) هتوفر لكل شاب من شباب الأسرة المصرية الشقة والعروسة وقبلهم فرص العمل.
مادة 8: إنشاء وزارة الطفل (لأنه طفل اليوم، هو رجل المستقبل وغرس القيم الأصيلة وحب الوطن وفى غصون فى فترة ليست طويلة سوف يخرج جيل محب لوطنه، محب للعمل).
مادة 9: عدم استيراد كراسى من الخارج (وده طبعاً معروف ليه).
مادة 10: رفع رواتب رجال الشرطة ورجال التربية والتعليم ويسبقهم الأطباء وبقية المهن والوظائف بما يتناسب مع ظروف المعيشة وإعادة النظر فى تقيم بعض المهن والوظائف (أمناء الشرطة، موظفى الدولة).
مادة 11: عدم زراعة أو استيراد أو أكل الكوسة وقتل الرشوة والبطالة بالتلاتة فى ميدان عام على مرأى ومسمع الجميع.
مادة 12: ربط العملية التعليمة (إعادة النظر فى المقرارات التعليمية) باحتياجات سوق العمل وتغير الثقافة عن بعض المهن كأن يكون الجامعى نقاش أو سباك أو خلافة.
مادة 13: يتم تخيير الستات بين العمل وبين البيت علشان تفسح الطريق لزوجها أو ابنها أو أخوها أو والدها وهديهم نصف المرتب اللى كانوا بتقاضوه أثناء العمل.
وبعدين صحيت مفزوع على صوت زوجتى علشان أحضر الفطار.. اللهم إنى أعوذ بك من شر ما رأيت.. كوابيس والسلام.
رد مع اقتباس
رد: كوابيس ولكن !!!
المفضلات