-- وطني حبيبي
بسم الله
اول ما حد فينا يسمع كلمة وطنى حبيبى ايه الصوره اللى بتيجى فى دماغه فى فيمتو ثانيه؟
اقولكم ...
حليم وشاديه وصباح وفايزه احمد وورده الجزائريه وغيرهم واقفين منشيين وبيغنوا اغنيه من اجمل ما سمعت اذاننا ...
فكلما سمع احدنا كلمة وطنى حبيبى نشعر برعشه داخلنا لا اراديه ولكن سرعان ما تتوقف هذه الهزه ومن ثم تتبسم وجهونا ونرد بين انفسنا وبيننا وطن مين ياعم الاهم مين اللى خطف مصطفى قمر سيد درفه ولا سهير سيليكون ؟
طب متيجوا نتكلم بجد نشوف ايه اللى خلى السليكون شاغل دماغنا اكتر ...
تيجوا نغنى الاغنيه سوا....
ايه ياعم هنغنيها عادى قول كده معايا؟
وطنى حبيبى الوطن الاكبر يوم ورا يوم امجاده بتكبر وانتصراته ماليه حياته وطنى بيكبر وبيتحرر وطنى وطنى
ااااااااااااااااااه ااااااااااااااااااااااااااااااه اه اها اه
هههههههههههههههههه
غنى الاغنيه دى صفوه من اجمل الاصوات ولحنها موسيقار الاجيال محمد عبد الوهاب طبعا
طبعا بتقولوا برهان اتجنن ولا ايه؟
والله انا زى الفل متقلقوش انا بس عاوز اعرف ليه لما قريت الاغنيه كنت بتقراها بصوت واطى؟ ليه متعليش صوتك وتغنيها بصوت عالى ؟
عشان قديمه ولا عشان مبقاش لها وجود؟
الاغنيه دى اتغنت فى الستينات على ما اعتقد....
وبعد حوالى 40 سنه ................
نخبه من اجمل الاصوات واشهر وامهر الملحنين يتجمعون فى اكبر عمل فنى غنائى عربى وكلهم بصوت واحد وقولبهم على قلوب بعض واديهم فى ادين بعض وبصوت عالى بيقولوا ....
ماتت قلوب الناس ماتت بنا النخوه يمكن نسينا فى يوم ان العرب اخوه ....
طبعا واضح الفرق من انتصراته ماليه حياته لانتكاساته دمرت حياته..
طب الاولى كنا بنقول قديمه وكنا بنقول مبقاش ليها وجود طب دى جديده وهى فعلا الحقيقه يعنى ليها وجود .........طب معلتش صوتك ليه ؟ تقدر دلوقت تعلى صوتك بيها؟ برضه لا
وطن
ايه؟ بتقول ايه؟
بقول وطن ........وطنى ووطنك وارضى وارضك عرضى هو عرضك اهلى مع اهلك مالى على مالك ابنى هو ابنك دمى مع دمك نبنى ونعلى وندافع ونحمى
بقولك وطن بيجمعنى وبيجمعك لما ينهزم انا وانت نبكى ولما ينتصر احنا كلنا نرقص . ليه بنتكسف دلوقت ؟
عبد الحليم قال وقتها .... وطنى يا مالك حبك قلبى وطنى يا وطن الشعب العربى ياللى ناديت بالوحده الكبرى بعد ما شوفت جمال الثوره انت كبير واكبر كتير من الوجود كله من الخلود كله يا وطنى.....
يااااااااااااااااااااااااااااااه ايه الجمال ده؟ كان نفسى اكون عايش ايامها بجد والله احس بالعزه دى
ياترى حد دلوقت يقدر يكتب كلمات زى دى؟ او حتى شبيهه؟ معتقدش على راى المثل منين يجيها لا بتسرق ولا جوزها بيديها ......
ازاى نكتب كلام احنا مش حاسينه لاننا طبعا عنينا لا تراه..
وائل جسار رد على حليم عبر الزمن على صوته وقال بكل جرأه....
اطفال شيوخ نساء تصرخ ومحدش سامع .... اشلاء دماء شهداء وضمير العالم ضايع.
الشطر الاول نكسه والتانى وكسه ...بين قوسين مش فاهمينك يا برهان ....افهمكم واكسب فيكم ثواب
الناس بتصرخ كبار وصغار ومحدش سامع دى طبعا نكسه واننا ننتظر ضمير العالم يدافع عننا ويجيبلنا حقوقنا دى الوكسه .
انا مش بديكم درس تربيه وطنيه ولا بعلمكم ازاى تحبوا وطنكم انا بس عاوزكم لما تتجوزوا وتخلفوا انشاء الله تربوا عيالكم انهم يحبوه علموهم ينتموا اليه عرفوهم هو كان ايه وليه وصل للاضمحلال والتدهور ده ...
ولادنا ايه يبنى هو احنا عارفين نشتغل عشان نتجوز عشان نجيب عيال؟ هو الواد ده مجنون ولا جاى من كوكب تانى؟
لا يا جماعه انا منكم وزيكم وعايش نفس مشاكلكم بس حبيت اوصلكم نقطه
ان طول ما انتم يائسين وطول ما انتم مستسلمين ومأنتخين محدش هيجيبلكم حقوقكم ولا هتتجوزوا ولا هتشوفوا عيال ولا حتى هتنولوا شرف انكم تكتبوا اغنيه زى الوطن الاكبر.......
نفسى افكركم بنشيد كنا بنغنيه واحنا صغيرين فى الابتدائى ..
صوت بلادى بلادى بلادى بيدوى عبر الاجيال .... صوت حضاره من يومها جباره يما صنعت ابطال ورجال
صوت شعب ماشى الاف السنين كل خطوه منه كفاح ملايين امجاده كتبها فى حياته مصر حيتها خطى المخلصين
مش عاوزكم تعملوا اضراب ولا تعملوا اعتصام ولا حد يجى يسالنى بسزاجه ويقولى عاوزنا نعمل ايه؟
انا عاوزكم تصحوا جواكم كلمتين ( وطن .... انتماء )
مش عشانى ولا عشانك لا والله عشان اولادى و اولادك ..اصل تقريبا احنا مش هنشوف انتصار فى عصرنا فعلم ولادك ازاى يحققوه ...
بس
برهان البيك
المفضلات