اتكلمى

**أشرف صالح** · 23-03-2009, 01:55 PM

فكى قيودى من العزاب
عدى الحدود
يالى بنيتى من الألم أعلى السدود
عيشى بقلبك وارحمينى
كل اللى ضاع من سنينى
ممكن يعود
ابنى الأمل وأعرفى
أن الأمل موجود
هى كلمة هتقوليها
مش مقال راح تكتبيه
أو عمود !
وانتى وأنا نعدى السدود
نعبر حواجز صمتنا
بعد اللى فات من عمرنا
والحلم يصبح علمنا
ننسى اللى راح
ننسى الجراح
ويومها تظهر شمسنا
لو ترحمى ! لو تفهمى !
بس انتى قولى
اتكلمى

**اميرة حبى انا** · 23-03-2009, 03:54 PM

واضح اننا كسبنا شاعر عظيم
المفروض نعملك انت واستاذ جمال مسابقة لوحدكم
ولواننا مش هنعرف مين فيكم المفروض يكسب
لان كتاباتكم انتم الاتنين اروع من بعض
ماشاء الله
تسلم يااستاذ اشرف

**fagrmasr01** · 23-03-2009, 10:40 PM

الله ينور على حضرتك يا أستاذنا
انا شخصيا هاعطى صوتى للأستاذ اشرف
لأن انا شخصيا بتعجبنى كتاباته

أستاذ أشرف
ابداعك فعلا له طعم خاص ..
أشعر معه بجمال التذوق للمعانى

أستاذنا .. تسلم ايدك
يارب يبارك .. ويزيدك

**أشرف صالح** · 23-03-2009, 11:24 PM

شكرا شكرا شكرا ياأميره لحضرتك كتير

**أشرف صالح** · 23-03-2009, 11:32 PM

ألف ألف شكر ليك يا أستاذ جمال والله العظيم أنا با أستمد الشجاعة فى الكتابه من كلماتك الرقيقه وأقسم بالله أننى لست بمجيد لأستخدام الكمبيوتر وهى بتيجى معايا من عند ربنا ونفسى أعرف ازاى أكون مشارك بفاعليه وعلى فكره أنا قرأت بالصدفة دردشتك مع أميره وأسف انى باتكلم من غير ألقاب بس أنا فعلا عايز درس جامد لغاية ما أفهم
الموضوع ألف شكر لكل من يحاول تقديم المساعدة وربنا يخليكوا وتستمر فكرة المسابقات لأنها رائعة