مش عارف تسكت .. هو انت لازم تفضحه ؟!!
انت أيوة انت
انا بكلمك يا اللى بتتبع افعال الناس وتكشفها للغير
لما تشوف عيوب فيهم وتروح تفضحهم قدام الناس
لما يضايقك منهم حاجه وتروح تشهر بيهم وتقول اصل مافيهاش حاجه دى حاجه عادية
اعرف بالله عليك ان العادى عندك مش عادى عند غيرك
ازاى تفضح وتقول عادى !!
فيها ايه لو شوفت صاحبك كدب وسترت عليه ونصحته بينك وبينه
فيها ايه لو لاقيت حد مش بيغض البصر فسترت عليه ونصحته وقولتله النظرة سهم من سهام ابليس
فيها ايه لو سمعت حد بيضحك بصوت عالى اووى لدرجة انه ضايقك فيها ايه لو مسكت نفسك وسكت
ومش قولت للغير حتى لو اقرب شخص ليك ودعيت ليه فى السر ان ربنا يهديه
فيها ايه لو جارك مضايقك وبيعمل افعال مش حلوة معاك وسترت عليه ومش قولت لحد
بنية انك بتستر عليه عشان ربنا وقولت هاصبر عليه وهانصحه
وهحاول معاه مرة واتنين وعشرة اصل سيدنا محمد صلى الله عليه وسلم وصى بالجار
فيها ايه لو صاحبك او صاحبتك قالت جملة مكسرة وكلامها ضعيف ومش بتتعرف تتكلم
وقولتم مش هانروح نقول دى فلانه مش بتعرف تتكلم وسترتوا عليها
فيها ايه لو لاقيت صاحبك بيتخانق مع والده وسترت عليه وماطلعتش
قولت الحق يا فلان الحقى يا فلانه دا الشخص ده معاملته وحشة مع ابوه
فيها ايه لو اخوك عمل فعل وحش فى حق اهلك وهما مش يعرفوا فسترت انت عليه ونصحته
فيها ايه لو حد قريبك مظهره مش حلو اوى فانتى سترت عليه وماطلعتش قولت دا مابيعرفش يختار ولا يلبس
وجيت انت علمته الطريقة الصح باسلوب جميل ذكى من غير ماتحرجه
ما هو اللى فيهم عيوب دول احنا زيهم فينا عيوب ويمكن اكتر منهم
لكن نوع عيوبنا مختلف عنهم ويمكن زيهم لكن احنا مش شايفين
اوعى تفضح انسان عشان تضحك غيرك زى ما حطيته فى الموقف
يمكن يجى وقت وتتحط فى نفس الموقف وتكون فى قمة احراجك
وتقول ياريتنى ما عملت كده فيه
ما تنساش انك كما تدين تدان
ففيها ايه لما تمنعوا نفسكم من الكلام وتقللوا منه تشوفوا وتسكتوا هاتخسروا ايه ؟!!
فيها ايه لما تستروا ع غيركم ويكون عندكم صبر وكتم للغيظ وتتحلوا بافضل الاخلاق
وتقولوا يارب احنا بنعمل كده عشانك هاتلاقوا ربنا هايكرمكم جدااااااااااا
ولما تنصحوهم فى السر هاتلاقوهم بيستجيبوا وبيتغيروا للافضل وبيندموا
لكن لو فضحتوهم هايزيدوا فى الغلط وهاتكونوا السبب فى زيادة غلطهم
فطولوا بالكم وخلى عندكم صبر ونيه ان هدفكم خير
والحديث بيقول (( لا يستر عبد عبداً في الدنيا إلا ستره الله تعالى يوم القيامة ))
وحديث كمان بيقول ( كل أمتي معافى إلا المجاهرين وإن من المجاهرة
أن يعمل الرجل بالليل عملاً ، ثم يصبح وقد ستره الله عليه
فيقول : يا فلان عملت البارحة كذا كذا ،
وقد بات يستره ربه ويصبح يكشف ستر الله عنه )
فاستر ع قد ماتقدر عشان ربنا يسترك فى وقت هانكون عاوزين نتمسك ولو بحسنة واحدة بس
فيمكن تكون ديه حسنتك
فلا تحقر من الخير شيئا
وافتكر ان كرم ربنا سريع جداااااااا ويفوق تصورك
واعرف ان الخير اللى بتعمله عمره مابيروح
وزى ما سترت ع غيرك هاتلاقى اللى يستر عليك
فمن النهارده قول لو شفت بعينى حاجه فى الغير مش هاقول عليها للناس
وهانصحه بينى وبينه لانه انسان بيحس وهايتحرج جامد اوووى لو شهرت بيه
الله لو خليت نيتك كده صافية وقلبك ابيض وهمك كله افادة الغير ونصحهم
هاتكون من الناس النادرين اللى يتوزنوا بالدهب والكل هايقرب ليك ويحبك
وقبل ده كله هاتحصل ع رضا ربنا باذن الله
ندعوا الله ان يهدينا ويصلح حالنا للافضل ويبعدنا عن كل المعاصى والذنوب
وربنا يجعل جميع افعالنا واقوالنا خالصه لوجهه الكريم
وفى رعاية الله اخوتى
رد مع اقتباس
المفضلات