مره، كنت فى اسكندريه انا و ابويا و انا اللى سايق و عايزين نروح المعموره ابويا قالى امشى من هنا انا عارف الطريق كويس بعد كده ب ساعه لقينا نفسنا فى حته عجيبه وتوهنا فقلتلوا خلاص انا هاسأل فبوقف واحد بقوله لو سمحت عايزين نروح المعموره قالى يااه المعموره اللى فى اسكندريه


=====================


النهارده، و انا راكب الترام و ماسك كتاب جراحة، واحد عجوز اخده مني و قعد يقلبه و سألني مكتوب عليه ايه ؟ قولتله مكتوب عليه جراحة بس بالانجليزي، بعدين بسأله حضرتك بتشتغل ايه ؟ قاللي دكتور نسا


=====================


النهارده، لقيت ابن اختى جالى هو فى كى جى 2 جالى، بيقولى خالو قلتلو نعم يا حبيبى قالى انا عايز اقولك على حاجه بس متقلش لماما قلتلو قول، قالي انا فى واحده معايا فى الفصل وبحبها وعايز اتجوزها


=====================


النهارده، كنت رايح انا و ابويا المريوطية فبويا مش عارف الطريق فسأل سواق تاكسى و احنا مشيين، السواق قالوا كمل على طول لحد مايطلع عليكوا ناس يثبتوكوا


=====================


مره، كنت عند واحد صاحبي في السنترال بتاعه وجات واحده اشترت خط وادتني بطاقه وقالت شغلهولي، كلمت خدمه العملاء،امليه رقم البطاقه يقولي الرقم غلط، امليه تاني يقولي الرقم غلط ومش موجود في السجل اصلا، فسألت البنت هي البطاقه دي مضروبه ولا ايه قالتلي لأ دي بتاعت بابا الله يرحمه


=====================


النهارده، عملت كوبايه قهوه، فارت و مطلعتش بوش، قولت مش مهم عادى، لسه بصبها لقيت الكوبايه فرقعت، جبت غيرها و صبيت و لسه بشرب راحت مدلوقه كلها عليا بهدلتلى هدومى


=====================


مره، كنت قاعد في امتحان ماده زي الزفت واساسا الدكاتره بتوع الماده دي مابيحبوش يدو حد تقدير خالص، والدكتوره ماشيه في وسط اللجنه عماله تقول ايه الاخبار الامتحان عامل ايه؟، فواحد رد عليها و قالها حلو، بصتله بقرف و قالتله انت انسان منافق


=====================

النهارده، كنت بحضر عملية ولادة قيصرية تبع الكلية لقيت دكتور التخدير دخل و قبل ما يخدر الست اللى هتولد حط ايده على كتفها و قالها : انتى متجوزة؟ راحت بصتله كدة من فوق لتحت و قالتله لأ


=====================


مره، كان حبيبي جايبلي هديه عشان كان مزعلني فقولتلو معلش مش هقدر اخدها تقل بقى و كده تاني يوم لقيتها مع واحدة صاحبتي


=====================


النهارده، اتصلت بحبيبى عشان كان زعلان منى و اعدت اتأسف، راح قالى انتى زودتيها و بقيتى رغايه اوى و بتتحايلى كتير و انا اتخنقت منك و متتصليش بيا تانى و قفل السكه فى وشى، اتنرفزت و روحت راميه الدبله بتاعته من البلكونه، بعدها على طول كلمنى قالى انتى صدقتى يا هبله انا كنت بهزر



طبعا دى كلها مواقف حصلت لناس مش ليا









منقول