مش عارفة ليه التواريخ المهمة في حياتي والي المفروض اني افتكرها لوحدي مش بفتكرها... رغم حرصي عليها اوي
حتى لو حد فكرني بفضل متنحة شويات واستنى اسمع منه باقي الي يخص التاريخ

من اشد المواقف المحرجة في حياتي خاصة مع الي بحبهم وبحرص على اني اكون مهتمة بكل الي يخصهم زي ماهما مهتمين بالي يخصني بشكل بحبو

المشكلة اني من وانا صغيرة عندي عقدة الارقام وخاصة لما مستر احمد ضربني عشان نسيت 2×9=؟ مدنيش فرصة افتكر ولا ادى نفسو فرصة يسمعني ويسالني انتي حضرتي الدرس ولا لا

اكتشفت مع الوقت ان عندي عقد كتير اوي وبتزيد مثلا عندي عقدة السبانخ وعقدة فيش الكهربا وعقدة الحيطة المتاكلة وعقدة القلم الي متاكل اخرو من كتر التفكير ال يعني وعقدة الطربيزة وعليها بقع الكوبيات وعقدة الروائح الكريهة ( ودي ماساة مش عقدة )

بعض عقدنا من الصغر بتكبر معانا لدرجة نعند مع نفسنا ونخسر كتير بسببها او اننا نعند ونبقى احسن فيها اوي وننجح فيها عند للناس الي تسببت في كدا ونثبت ليهم ومش لنفسنا اننا بقينا احسن كتير من استهزائهم بينا

زي مثلا السبانخ ( جدتي حببتي الله يرحمها كرهتني فيها من كتر متقولي كليها وتغصبني عليها وتقول كلمتها المشهورة دي كلها حديد واول مسمع كلمة حديد افتكر ريحة المفاتيح فربطت بعقلي ريحة المفاتيح بطعم السبانخ ) يارب سامحني (

الخلاصة مفيش عقد ايجابية كل العقد سلبية وجدا لانك بتعاند على حساب نفسك من غير متحس وتكتشف بعد فوات الاوان انك خسرت وقت وجهد او سيبت نفسك وخسرت حاجات

نفسي منخليش عقدنا تهزمنا باي طريقة كانت... بس لو قدرنا اننا نتخلص منها اكيد هننجح في اجتياز عقدنا الكتير الي
تراكمت فوق بعض لغاية معملت حاجز فولاذي عايز يسيح .

-

عندكم عقد كبرت معاكم؟

ايميليا






منقول