أسف على الأزعاج

[اميرة حبى انا]

على فكرة يا أميرة الموضوع هنا غير مطروح فيه فكرة المشاكل او الخناق انها فى النهاية مجرد آراء للجمع ولابد من ثقافة سياسية للجميع ان يعلم كل منا ما يدور حوله وكل كلمة تذكر فى اى موضوع لابد وان يعلم ما هو المقصود منها من داخل تلك البلاد او خارجها
اتمنى مشاركة جادة من الجميع

عايز مشاركة جادة
طيب
لما يكون رأيئ فى اواخر ايام الثورة ان حسنى مبارك مكنش لازم يتنحى والرئيس الجديد يجى فى ميعاده وبانتخابات والشعب اللى هيختار
لانى حسب ما شوفت او فهمت انه خلاص الدنيا اتقلبت عليه وخلاص لا سنه ولا صحته يسمحوله يضحك علينا تانى
خصوصا بعد ما عين نائب رئيس وبعد ما عين رئيس وزراء زى الفل وبشهادة ناس من الجيش والله مش كلام من عندى وبشهادة فاروق الباز وناس محترمة كتير
يبقى انا مع الثورة ولا ضدها
لما يتكتبلى بالحرف فى رد (فكروا وحاولوا تعيشوا بكرامة بقى كفاية رضا بالذل)
هو رأيئ فى ميعاد او طريقة انتهاء حكم مبارك
لكن الثورة على عينى وراسى
هو انا لازم اقول انى من الناس اللى عنيها اتحرقت من القنابل المسيلة للدموع
هو انا لازم اقول ان جوزى وابنى اللى عنده 10 سنين اترمت عليهم القنبلة وكانوا فى وسطها والولد طلعلى خلصان بسببها وجوزى عينه كانت هتبوظ
هو انا لازم ادخل اقول كده
معلش
انا مش من الناس اللى لو حصلها حاجة هتحكيها او تعبانة هدخل اقول بكلمكم وانا عندى برد مثلا
انا من الناس وفى منكم عارفين كده
اللى بتعمل بس فى صمت
مش لازم حد يعرف انا بعمل ايه
ومش لازم لما اقول رأى مخالف لرأى حد او استخدم صلاحياتى كمديرة تبقى دى عيبة وابقى بستخدم نفوذى
طب انا عملتلك موضوعك (بدور على اصحابى هما فين) تنبيه عشان يوصل للناس فى الرسايل عشان يدخلوا ويشاركوا ويعرفوا ان محدش ناسيهم حتى الاعضاء الجدد
وده من صلاحياتى كمديرة
هو انا مديرة ايه بالظبط
ده منتدى
عرفت بقى بقولك اتخانقوا لوحدكوا ليه
بس عشان حسيت انك زعلت من ردى او اعتبرتنى بتريئ
لكن انا ابدا عمرى ما اعمل كده
ارجو اكون وضحتلك

[الرومنسى]

حاجة انتى مش فهماها يا اميرة انا مزعلتش من ردك لانك تجاهلتينى او لاى شئ تانى
الفكرة اننا منكنش سلبيين نحاول نتحاور انا لو فهمى غلط مين هيصحح الفكر دة لو أدعديت على حد هقول انى صح وملكوش دعوة بيا
الفكرة عندى التحاور اقنعنى او اقنعك حتى لو فضلنا نتحاور سنيين المهم نوصل لحل لان الحوار شئ جميل وديما ليه نتائج مفيدة دى حاجة
الحاجة التانية ان البلد للجميع مش لفرد واحد يقول رأيوا وبس
الكل لازم يشارك وتبقى ايه فيدة الثورة لو ركزنا على كل الناس اللى فى الميدان والباقى ملهوش رأى هنلاقى اننا غلط لان الديمقراطية اللى بنطالب بيها لابد من احترام الرأى الاخر حتى لو فقد الصواب فى جوهرة ومجملة
الاخيرة
كلامك جميل وواقعى والاكثر من ذلك
وجود مطامع خارجية لتكوين سياسة داخلية تؤدى فى النهايه الى شئ واحد استعمار من نوع جديد وايضا اتخاذ القرار بالتخاذل من البعض شئ خطير اشباع المظاهرات داخل الجمهورية بالخلاف والتشدد لا تأتى بثمار جيدة هناك اشياء كثيرة خلف الجدران المغلقة لابد من الحوار

[خلود]

اه يااميره فكرتينى بالقنابل اللى اترمت جمب بيتنا وقعدنا ندور على الولاد وعلى زوجى وزوجك

واتخنقنا وكان يوم ميعلم بيه غير ربنا

والله يااميره مش كل الناس هتتفق على حاجه واحده

حلو موضوعك يامحمد وادعو الجميع معك للمشاركه فيه

[الرومنسى]

فعلا يا خلود فيه كلام كتير وحجات حصلت
ويمكن فيه كلمة قلها السيد عمر سليمان فى حديث ليه
إن الشعب المصرى غير مؤهل للديمقراطيه
والدنيا ثارت عليه بس لو أخدنا منتدى زى اللى احنا فيه أكيد هنلاقى إن الخلاف هنا لاننا متعودناش على الديمقراطية السليمة
فى تقبلنا للرأى الاخر
وهنا تكمن المشكلة