ياللى طلبت وداعى .. وداع * من بعد ما قلبك فاتنى وباع

ياللى قتلت الحب ف عمرى * ليه تتركنى فى طريق ضياع

مش جاى اعاتبك متخافشى * انا جاى اقولك وانا بامشى

ان عشانك يا حبيب الروح * حاتهون عينى وفداك رمشى

دموعى سايلة .. على خدودى * وتنعى معايا .. وتبكى ورودى

واحكى لك .. ياحبيب أحلامى * ونبضة قلبى وعمرى شهودى

وداع يا حبيبى يا هنايا * يا سر ضحكتى وأسايا

يا فرحة عمرى وأيامى * هاتفضل ذكراك جوايا

انت طلبت وداعى وكان * زى ما حبى عندك هان

لازم قلبى انا أبعده عنك * ويكفينى ان قلبك خان

هابكى عليك بدموع العين * لكن وعدى يا نور العين

لو يوم ترجع تانى لقلبى * مش راح تعرف سكتى فين

وفوق هناك عند النجوم * فى مكان ما كنا بنتقابل

بنيت هناك قبرى بايدى * ودفنت قلبى بلا مقابل

ومهما الروح هتنادى عليك * أوعينى وقلبى يحنوا اليك

مش راح تسمع نبضة قلبى * ولا روحى الهايمة حواليك

مش غلطان انا انا حبيتك * انت ناديتنى وانا لبيتك

قلبى عشقك وانت نسيت * ياريتنى عمرى ما حبيتك

ايوة باحبك مش هانساك * وانا عارف ان انا باهواك


لكن انت اللى طلبت وداعى * مش هارجع تانى اترجاك