انا ليه باشرب مخدرات







اولا .. لازم اقول توضيحا للعنوان اني مشربتش مخدرات قبل كده ومش مدمن عشان محدش يقول عليا ضريب قديم ولا حاجه .. ولكن ده ميمنعش اني اقول اني جربتها مرة واحده على سبيل التجربه فقط ولمعرفه سبب تكالب الناس وراء تلك المتعه المحرمه شرعا وقانونا ..



بين اصدقائي وجموع المعارف كم مهول منهم يتعاطى المخدرات .. الحشيش والاقراص المخدره المتمثله في اقراص الترامادول .. ناس محترمه ومستويات اجتماعيه متفاوته .. الواحد فيهم تشوفو تقول عليه هو ده الاحترام في حد ذاته .. لكن اخر الليل حاجه تانيه خالص ..



ليه الناس دي بتضرب مخدرات ..؟؟؟ سؤال قعد يلازمني طول مسيرتي في الحياه .. وكل شويه اتخبط في تعريف واجايه شكل .. وان كانت الاجابات كلها مضمونها حاجه واحد .. الجري خلف شعور النشوه والبعد عن قرف وعوء الدنيا ..



ك .. راجل مدرس محترم .. قمه في التدين والاخلاق والادب .. سباق بالخير دونما اعلان او اشهار .. اسرته الصغيرة السعيده دوما . منزله الغارق في ترف الدروس الخصوصيه .. ابتسامه عريضه تزين وجهه طيله الوقت .. ما حاجته الى المخدرات ..؟؟



انا : الا قولي يا حج ك .. انتا بتضرب ايه ..؟؟

ك : حشيش يا ابو طايع

انا : وده كويس ..؟؟

ك : ستاف تمام يا ريس ولو مش مصدق جرب

انا : وعلى ايه .. اصلي باكتب موضوع لقهوة المصريين عن موضوع المخدرات بس ..

ك : قولتلي .. طب تاخدني صورة وانا باضرب بالكوبايه طيب ولا ايه ..؟؟؟

انا : الطيب احسن .. انت بتشرب من امتى اساسا ...؟؟؟

ك : ياااااااااااااه .. يجي كده من 15 سنه

انا : 15 سنه حشيش .. حشيش بس ...!!

ك : لا طبعا .. انا بنادي بالتغير طول عمري .. عديت على التراما – الترامادول هيدروكلوريد – والافيون .. بس الحشيش عمهم

انا : هو انتا بتحشش ليه ..؟؟؟

ك : بص .. انا كنت باهرب من تخاريف الدنيا .. علاقه حب فاشله .. مفيش فلوس عشان اتجوز .. اتجوزت وبوزي في بوز المدام وزهقت منها .. بعد كده تعب الدروس .. تعب الدنيا .. كل ما اعدي هم الاقي غيرو حضر .. فبقيت مدمن لقعده الحشيش اكتر من الحشيش نفسو .. بتحس نفسك طاير في ملكوت تاني خالص .. قفشه من هنا على ضحكه من هنا على نكته قبيحه وكام حدوته على كام غنيوة .. الواحد يروح البيت وصدرو مغسول من الهم ومن كرب الدنيا .. بس .. انا كل يوم خميس من كل اسبوع اضرب القعده التمام والسيجاره التمام .. اروح اضبط المسائل .. ساعتها بس باحس بحلاوة الدنيا

انا : هو الواحد ميحسش بحلاوة الدنيا غير لما يحشش .. طيب مانتا ممكن تحس بحلاوة الدنيا لما تقعد مع بنتك همسه مثلا ..

ك : ماشي .. مانا عشان افضل عايش لهمسه باضرب حشيش .. عشان اقدر استحمل الدنيا دي باصبر على الاسبوع كلو لغايه لما يجي الخميس .. عارف انا باستنى الخميس ازاي .. زيي زي العروسه الجديده .. اللي جوزها باخد اجازه كل خميس بس .. عارف الشعور ده ..؟؟

انا : حد قالك عليا بنت ولا ايه ..؟؟

ك : لامؤاخذه يا ابو طايع .. التشبيه اللي جه في دماغي بقى ..

انا : هو ناوي تبطل امتى بقى ..؟؟؟

ك : باذن الله بعد لما يموت اللي بالي بالك باذن الله

انا : اللي بالي بالك مين .. محمد سعد ؟؟

ك : اسائل صاحبك كريم ( ايرونيك سايلنس ) وهو يقولك مين اللي بالي بالك





ده كان ك .. الجدير بالذكر ان ك مرضيش ورفض انو يقول زياده عن كده لاني قلبت عليه المواجع .. عندو حق .. هو اساسا هارب من الدنيا .. والساعتين اللي بيضرب فيهم هو والناس اللي معاه .. بيخلوه ملك ... طيب تعالو نروح ونركب بساط الريح ونوصل الصيدليه بتاعتي .. عم ش .. راجل كبارة .. محترم بالبدله الشيك والبرفان اللي تشمه من على بعد خمسين كيلو ... كل يوم يجي الصيدليه ويسالني عن اقراص الترامادول .. وبين قوسين .. ما هو الترامادول .. هو عباره عن مسكن قوي للالم .. ويستعمل ومن الاخر لاطاله العلاقه الزوجيه .. يستخدمه الكثيرون .. لهذا السبب .. بينما الاكثريه يستخدمونه في غرض اخر .. للترمادول تاثير السحر على الجسد .. يمنحه طاقه هائله .. طاقه تكفي لهدم جدار في ثواني دون الشعور بالتعب .. القدره على السهر .. القدره على التركيز ..



نرجع تاني للعم ش .. كل يوم بالليل يجيلي .. العم ش ده متجوز جديد .. مراته اتوفت – تعالو نقرا الفاتحه ليها .. بسم الله الرحمن الرحيم .....- من كام شهر .. وصاحبو وصوه انو يتجوز احسن من القعده لوحدو .. وكمان عشان يلاقي سبب يرجع البيت عشانو .. المشكله انو اتجوز واحده اصغر منو يجي ب 20 سنه كده .. مش موضوعنا ده دلوقتي .. وبلاش نحكي عن سبب موافقتها او طبيعه العلاقه بينهم واذا كانت بتقولو يا بابا وهو بيقولها يا بنتي في البيت ولا ايه .. مش حكايتنا خالص .. الحكايه انو في فرق سرعات دلوقتي .. فرق سرعات من بتاع هاني رمزي في محامي خلع ..فرق سرعات يحتاج الى تدخل التراماول .. مشكله الترامادول هو الاعتياد .. مش الاعتياد بمعنى التعود .. انما بمعني انك تستحلاه .. بتدمن الحلاوة بتاعتو دي ..



يجي يوميا في حدود الساعه 9 بالليل .. اول ما اشوفه باجهز المقص .. واقصلو قرص .. انا مش بادي حد تراما غير حبايب الحبايب .. وللاغرض الزوجيه بس .. بس مش عارف شكيت فيه .. شكيت انو متجوز واحده تانيه .. لان استحاله حد ياخد تراما كل يوم .. كل يوم .. ايه مفيش ملل ولا ايه .. بردو مش موضوعنا .. ادي كلامي معاه ..



انا : هو كل يوم يا حج ..؟؟

ش : طبعا .. مش عريس جديد

انا :ومش ناوي تبطل على كده ..؟؟

ش : وابطل ليه .. دانا مستمتع كده

انا : طب مسمعتش عن اضراره ..؟؟

ش : طبعا سمعت .. بس يديني ويديك طوله العمر

انا : الله .. يعني ايه ..؟؟

ش : يعني انا خلاص في اخر المشوار

انا : طب سؤال للتاريخ كده ..؟؟

ش : قول

انا : انت مش بتحس نفسك صناعي وانت بتاخدو ..؟؟

ش : صناعي ازاي يعني ..؟؟

انا : يعني انت مش انت .. حد تاني وطاقه تانيه

ش : احيانا بس بردو ببقى متمتع

انا : يا سلام ..!!!

ش : بص .. كل الناس بتاخدو .. جات عليا يعني ..

انا : يا سلام .. عشان الناس كلها بتاخدو يبقى انت تاخدو .. ايه العقلانيه دي ..؟؟

ش : الله .. مانتا عارف حكاوي الحريم .. وربنا يكفيك شرها .. انت اتجوزت ولا لسه ..؟؟

انا : ليه عندك عروسه ..؟؟

ش : عندك عروسه .. يبقى متجوزتش .. اه .. ماهو اللي ايدو في الميه مش زي اللي ايدو في النار ..

انا : يعني ايه ..؟؟

ش : ربنا يكفيك شرها

انا : شر ايه ..؟؟

ش : هتفهم لما تكبر

انا : يا راجل .. هو انا هافضل غبي لغايه لما اكبر .. متقول يا حج

ش : اصل الست شر وخير .. كوكتيل جميل ووحش في نفس الوقت .. بايدك تخلي حياتك حلوة .. وبايدك تخلي حياتك وحشه

انا : مش فاهم

ش : مش قلتلك لما تكبر وتتجوز .. باقولك .. افقعني قرص تراما عشان الحق العشا ..



حد فهم حاجه .. ايه .. فهمتو .. طيب اللي يفهم يقولي عشان طلاسم الراجل ده خلتني انكش شعري وانا بحاول افهم مغزى كلامو ... اخر حاله معانا النهارده هي ( و )... و ده محامي عقر .. ميخشش قضيه ابن الارندلي الا لما يكسبها .. دماغو دي تعجبك .. وجيه .. مهندم طيله الوقت .. عمري ما شوفتو الا بالبدله .. حتى في صلاه الجمعه والمواسم والاعياد وشم النسيم .. انا اتهيئلي انو بينام بالبدله وبيخش بيها الحمام ومش بعيد بينزل بيها البحر في جمصه لما يروح يصيف .. كتله من الوعظ والارشاد تمشي على قدمين .. حجه في الاحوال المدنيه .. وضليع في باقي الاقسام .. عبقري .. لما اروح ازوره في المكتب – لما يهف عليا ويوحشني ومعرفش اشوفه باروح ازوره .. ولله الراجل بيستقبلني ولا كاني فتحت عكا وحصن الكرك .. مش قصتنا .. ما علينا – لازم يطلع ورق البافره وقرش الحشيش ويرول السجاير .. بيستغل الوقت اللذيذ بتاعي ده – على حد قولو يعني – في استراحه من معترك القوانين وتشابكات المصالح .. ليه طريقع غريبه في لف السجاير .. وانا في حل عن ذكرها عشان محدش يقلدها .. وعشان هو كمان قالي هيرفع قضيه عليا لو ذكرتها في أي جهه وان حق الابتكار والاختراع مكفوله ليه



انا : الا يا و .. انت بتضرب حشيش ليه ..؟؟

و : طبقا للماده 41 للدستور

انا : ازاي يعني ..؟؟

و : الحريه الشخصيه حق طبيعي

انا : يا راجل .. طب سيبك من حوارات القانون دي وكلمني عادي

و : بص .. انا باكون في قمه تركيزي وانا باضرب سيجاره الحشيش .. باكون اذكى من بيل جيتس واينشتاين .. قوة التركيز وحاله الشفافيه اللي بتبقى عندي ساعتها بتخليني اشوف القضيه من ابعاد تانيه

انا : وعلى كده بتضرب قبل ما تقابل القاضي ..؟؟

و : طبعا

انا : طبعا ايه ..؟؟

و : طبعا الكلام اللي بينا ده كلام شات وانت مشفتنيش ولا تعرفني

انا : انجز يا عم المتر

و : انا لازم اضرب يوميا عشان اقدر اواجه أي مفاجاه قدامي في المحكمه او في القسم .. قبل ما اروح المحكمه .. باضرب سجارتين .. ببقى في اقصى درجات التركيز ..

انا : يعني انت بتضرب عشان التركيز ..؟؟

و : والمتعه الزوجيه

انا : والمتعه الزوجيه مالها كمان

و : هاني رمزي

انا : ااااااااااه .. فرق السرعات

و : هو ده

انا : بس

و : وطبعا لو في لمه يبقى جو القعده والنكت



وهكذا ... يجمع الضريبه .. بان الحشيش والتراما .. مصدر من مصادر المتعه الجنسيه .. مصدر مفيد للضحك والفرفشه .. ومصدر رائع للتركيز .. مفيش داعي اتكلم عن الاستاذ ه .. اللي قالي ان الحشيش مدر للبول .. عشان كده بياخدو .. او الدكتور ق .. اللي افتى ان الحشيش هو افضل علاج للخوف .. سيبك من صاحبي المدمن اللي معاهم معاهم وعليهم معاهم بردو ( ت ).. اللي بيقول : عارف يا ابو طايع .. الحشيش ده احسن حاجه في الدنيا

انا : اشمعنى يا تيــــــــــــــــــــــت

ت : يخليك تثبت اجدعها بنت في مصر

انا : ازاي يا عم الحشاش ..؟؟

ت : تضرب كوبايتين .. وتروح تقرب من البنت .. وسيب لسانك يتعامل

انا : واذا لساني معرفش يتعامل ..؟؟

ت : يبقى كعب جزمتها هيتعامل معاك



ما علينا من الاشكال دي .. انا اولا برفض أي حجه تخلي الواحد يصرف فلوسه على مهاترات زي دي .. ازاي واحد عاقل يجيب سم بايده .. اينعم انا مش بني ادم مثالي .. وباضيع فلوسي على السجاير .. بس قضى اخف من قضى .. بس كان فيه اجماع غريب من الناس الضريبه دي .. ان البانجو كيف العربجيه .. وان اللي بيضرب بانجو ده مش انسان اساسا .. ده بهيم .. طب ضيع فلوسك في حاجه نضيفه ..



طب ايه .. المفترض المقال دي ينتهي بحل للازمه دي .. عشان ميجيش مشرف القسم يحذفه .. او يخش حد من الاداره ويقول ايه الناس اللي مش فايقه اللي انت جايبها في المنتدى بتاعي ده .. او يخش مراقب او مشرف عام بالسبحه بتاعتو ويقول .. استغفر الله العظيم .. ايه الحوارات الاباحيه دي .. سيبك طبعا من كريم صاحبي اللي هيقعد يضحك ويقول .. الله .. احمد باشا انت ليه مجبتش سيرتي مع العالم دي .. خصوصا اني مدمن زي زيهم .. ( مدمن نت عشان ماخدش بان يا جماعه )



مش هاقدر احط حلول يا جماعه .. وانا متعودتش في أي مقال اكتبه او أي توبيك اسطره اني احط حلول .. اني باعرض وجهه نظري .. وعليكم التفكير .. انا باضرب مخدرات ليه ...؟؟؟؟؟؟؟؟؟؟؟؟