الحب اللي بيخطفك خطف





البت أمنيه سليمان ليها أغنيه روعه اسمها الحب ببجي في ثانيه . الأغنية روعه وجميله خالص . مش موضوعنا أمنيه سليمان لكن موضوعنا الحب اللي ببجي في ثانيه . قصدي الحب اللي بيخطفك خطف . الحب من أول نظرة




طبعا كلنا عشنا النوع ده من الحب . البنت اللي بتدخل مكان وتخطفك . بيبقى فيها كاريزما كده تخلى عينيك تنشل وعقلك يطير ويفكر في حاجه واحده بس . لازم اقرب منها وأتعرف عليها وأحبها ونتجوز ونجيب عيال وارجع بعد الظهر ببطيخه وهي تقطعها وتحطها في الفريزر عشان بعد الغدا نحلي . كل ده بيحصلك في ثانيه .




بتحس ساعتها بسهم من كيوبيد بيقطع قلبك وبيخليك في حاله مش طبيعيه . ممكن تاخدك الجلالة فعليا وتروح تتمحك ونحاول تتعرف عليها . وبرده ممكن ياخدك الخيال لبعيد . احكي لكم على موضوع سر – هو مش هايبقى سر لما اكتبه بس أنا أثق فيكم وعارف ان محدش هايفشي السر ده - أنا حصلي الموضوع ده من مده بنت زي القمر دخلت عندي الصيدلية من مده ( اخوكم شغال مدرس الصبح وعندي صيدليه العيله باديرها بعد الظهر ). أول ما دخلت لقيت عيوني بتتجمد على ملامحها . وحسيت ان البنت برده ارتبكت .



البنت ادتني الروشتة . مش عارف ليه أنا برده خدت وقت كبير وأنا اقرأ الروشتة . جبت الدوا وكتبت عليه يجيي كده في ربع ساعة – صحيح هما عشر أنواع بس برده ده رقم قياسي في تحضير الروشتة . وطبعا محدش يستغرب من كميه الدوا دي أصلوا الدكتور من القاهرة – حسيت البنت برده بتتلكك سألتني عن آخر أنواع الروج



أتفرجت على الروج يجيي كده برده في ربع ساعة . مش عارف ليه حسيت ساعتها إننا بنتلكك على بعض . بنحاول نسرق من الحياة وقت نقرب فيه من بعض . أسئلة كتير كانت جوايا ساعتها . بس عفويتي رفضت إنها تطلع بره لساني . وحتى وأنا بحط حاجتها في كيس وبقولها شرفتي بصتلي بصه غريبة قوي ولذيذه – وإسمحولي أقولكم لذيذه في نص الكلام - في نفس ذات الوقت . اللي طلع من لساني ساعتها كلمه واحده : هو انتي اسمك إيه ..؟؟



الغريبة أنها ردت بسرعة وكأنها ماصدقت إني أتحركت : غ



الانسه غ اللي أنا حسيت فعلا إنها أجمل بنت شفتها في حياتي هي السبب اللي خلاني اكتب الموضوع ده . أنا باهديلها الموضوع ده وباقولها مليون شكر على أجمل لحظات قضاها قلبي جنبك . ومليون شكر على استضافتك لعيوني جوة عيونك



السؤال اللي أنا عايز اعرف اجبتو هو : حصلك الموضوع اللذيذ ده قبل كده . انك تبقى في الشارع / الجامعة/ أي حته وتلاقي بنت تخطفك خطف وتحبها من أول ثانيه



في انتظاركم وانتظار تعقيباتكم