يا ناس يا هووووو .. محدش شاف مصر
قلبي واكلني عليها .. وبيتعصر عـــصر
كانت عايشه وسطينا ..عصر ورا عصر
يا ام الدنيا روحتي فين ومين اللى كسرك كسر
اوعي تكوني مسجونة . ربنا يفك عنك الأسر
اوعي تاخدي على خاطرك من اللى بينهشوا في لحمك
ياريت كان عدو كنا عرفناه لكن الطمعان فيكي من دمك
قالوا العلاج عندنا .. وأتاري كل واحد فيهم بيسمك
كفايه بقى .. كل ما تقفي على حيلك يهدوا في عزمك
ربنا ينتقم من اللى باعك واللى قال بحبك وظلمك
إرجعي عشان خاطري .. والله صوتي اتنبح
ولادك ماتوا بالرصاص .. ومنهم اللى إدبح
عارفه .. أنا شوفت فرعون في القفص وإتفضح
أصل اللى جه عليكي يوم .. من الوجود إتمسح
ويوم ما نبطل مليونيات .. هيبقى أحلى فـــــرح
لو شايفه نفسك تورته وهما بيقسموها
لو عندك شكوى وهما مش بيسمعوها
لو حد قال كفايه كده عليها وإرحموها
يقولوا : لسه موجودين اللى سرقوها
نقولهم طيب سيبوا القضاء يقول كلمته
قالوا : انتم مــــن الفلول وخربتوها
طيب احنا بنحبها وخايفين عليها
قالوا : لو مش عاجبكم تفكيرنا سيبوها
قولنا : طيب والفوضى والبلطجة
قالوا : دى كلمة خايبه وانتم اخترعتوها
مفيش فايده فيهم يا مصر .. مترجعيش
عاوزينها كده سايبه وفي نواياهم متنخدعيش
في الأول قالوا .. حرية وعدالة اجتماعية وعيش
دلوقتي خلوكي عريانه ورخيصة وماتسويش
حتى اللى بيتكلم بالدين قالوا عليه من الدراويش
خليكي زى ما انتي في مكانك
اصل الزمن ده مش زمانك
في البدايه كنا ايد واحده عشانك
دلوقتي عرفنا مين بيحبك ومين خانك
أنا اللى صعبان عليا الغلابة اللى عايشين الجوع
خايف نندم في يوم ومش هينفع وقتها رجوع
لازم نسمع لبعض .. والتخوين ممنوع
ونشوف مصر الأول .. رجوعها حق مشروع
بعيد عن اللى بيحرض وعلى خرابها مدفوع









منقول