سخان حياتى غاز يا ترى سخان حياتك ايه؟
سخان حياتى غاز
سخان حياتك ايه؟
تخيل نفسك كده و انت راجع بيتك بعد يوم شغل طويل و مقرف
و افضل حل عشان تتخلص من كل ما علق بيك طول اليوم
هوا شاور دافى قمت دخلت الحمام ومعاك الفوطه
انا بقى عايزاك تخرج من ذاتك المتبخره او المتجمده على حسب حالتك ،
بص لنفسك كده و انت عمال تظبط فى حنفية السخن والبارد
عشان توصل لدرجة حرارة الميه المظبوطه اللى تناسبك ،
حياتك بقى مش كده بالظبط دايما بتحاول تظبطها
لا انت عايزها سخنه
و مليانه شغل و مشاوير وزيارات و كلام وسفر وزحمه وخنقه من غير لحظه هدوء
واحده احسن تلسعك وتحرق جلدك ،
ولا انت عايزها ساقعه ممله وبارده
مليانه فراغ فى كل حاجه ووحده لدرجة ان روحك تتجمد جوا تجاويف قفصك الصدرى ،
انت بتكون عايزها بين الاتنين تدفيك فى الفصول الشتويه البارده
واللى احيانا بتكون عاصفه وممطره من حياتك و تنعشك فى صيف ايامك اللى شمسه ضاربه فى نافوخك.
يا ترى بقى بتستخدم انهو سخان عشان تظبط مية حياتك
غاز اللى كل التأثيرات بتاعته فوريه عايز سخن موجود بارد انت تأمر
بس مشكلته انك كل شويه لازم تمد ايدك وتجرب وانت وحظك يا تطلع سخنه
اوى فلازم تزود الساقع علشان تكون دافيه و ممتعه توصلك لنهاية رحلة الحياه بسلام وراحه.
و لا سخان كهربا لازم تملاه قبل ماتستخدمه وتسيبه فتره على ما يسخن دنيتك
بس بعد فتره مخزون الأشياء والمواقف الدافيه هيخلص
و هتفضل فى البارد لحد ما تملا السخان تانى وهكذا تعيش حياتك
على مراحل انت اللى بتحددها .و لا انت من غير سخان خالص حسب ما تكون مية الحنفيه
سخن بارد كله ماشى و انت ونصيبك زى ما تيجى.
بعد انتهاء رحلة التأمل الشاوريه دى يا ريت ترجع لذاتك تانى قبل ما تستهوى
وتاخد برد و تكمل شاورك بسلام و تقولى لو سمحت
سخان حياتك ايه ؟
رد مع اقتباس
رد: سخان حياتى غاز يا ترى سخان حياتك ايه؟
المفضلات