الفيس بوك كان الأول شىء ترفيهى بين الشباب وخاصة فى مصر إلا إنه بعد كدة بقى له دور كبير بين كل المصريين لدرجة إنه بقى مقر انعقاد مجلس قيادة الثورة

لكن تعالو نشوف إزاى الناس بتتعامل مع الفيس بوك



أولا التفرقة العنصرية



بنت تكتب علي بروفايلها انا تعبانة و عندي صداع
.
.
.

تاني يوم تلاقي 132 لايك
و 99 كومنت
( سلامتك يا قمر , و ان شالله انا ولا انتي....)
و 72 طلب صداقة
-
-
-
شاب يكتب علي بروفايلو انا تعبان و رجلي انكسرت أمبارح ,,
.
.
.
.
تاني يوم يلاقي لايك و 3 كومنت:
الكومنت الاول : تستاهل يا ابن الـ......
الكومنت التاني : ....عقبال التانيه
و الكومنت التالت : ههههههههههه

أنا شخصيا بقالى سنتين على الفيس بوك عمرى ماجالى طلب صداقة واحد من بنت
نفسى أجرب شعور الموافقة أو الرفض على طلب بنت للصداقة
شكلى هموت قبل ما أحقق الحلم ده



ثانيا والنعمة الفيس بوك موقع تواصل اجتماعى

طبعا أكيد وانت على الفيس بتلاقى ناس قافلة كل المعلومات بتاعتها ومقتصراها على الاصدقاء وبس
او مش كاتبين اصلا اى معلومات عنهم
طب داخلين الفيس ليه
الهدف من الفيس ان الناس تعمل شير مع بعضيها ويعرفو بعض ويتواصلو مع بعض
تعرف ثقافات تانية حضارات تانية لغات تانية ناس جديدة عليك
فانت لما تلاقى حد ليه تقريبا نفس اتجاهاتم وميولك بتطلب صداقة
يعنى نفس الفريق اللى بتشجعه نفس الاكاديمية اللى بتدرسو فيها حاجة هو شغال فيها عايز تعرف عنها معلومات اكتر
لكن حد انت متعرفش عنه اى ابن اللذين هتطلب صداقته ليه ؟
فى مصر تلاقى البنت حاطة معلومة واحدة عنها بس female واتفرج بقى على طلبات الصداقة اللى هتنزل زى الرز
بلد بتاعة بنات صحيح



ثالثا الغتاتة والرخامة


ممكن تلاقى بنت عاملة اهتمامتها interested in women
وتلاقى واحد رخم باعت طلب صداقة برده
يا رخم



رابعا ايوة انا مزة وانا كمان مز

صور البنات على الفيس كتير وممكن تلاقى صورة بنت واحدة على كذا اكونت طب ازاى
اصل صورة البت حلوة والبنات تقعد تنفسن على بعض فتاخدها تحطها على الفيس
او تجيب صورة ممثلة هندية ولا تركية اهو اى حاجة افضل من شكلها
وتلاقى الواد متصور بالبوكسر فى المصيف
طب هو بيفرجنا على بوكسره ليه ايه يا وديع
او صورة ليه وهو فى الجيم او وهو لابس نضارة سودا قال يعنى هو الواد اللى مفيش منه اتنين



خامسا ابجد هوز حطى كلمن

على الفيس كل الناس عندها اخطاء املائية
يكتب لاكن ، خطواط ، مطر ( مضطر ) ، زوء
وفيه اللى بيكتب بالفرانكو ودى اكتر حاجة بتخنقنى
وخد عندك بقى عينة كلام من نوعية يا سكر يا قمر يا عسل يا قمراية حوبى عثلية
نقعد نلزق بقى



سادسا أنا قلبى مساكن شعبية

فيه ناس تلاقيهم عندهم اصدقاء بالميات
ميتين وكام الف وكام اعداد كبيرة اوى
طب ازاى وليه وامتى متعرفش بالظبط
طب لو صاحب الاكونت فتح ولقى مثلا 10% فاتحين يعنى حوالى 20 واحد ولا حاجة
وحب يكلمهم هيكلمهم ازاى
فى الغالب اللى بيكون عندهم العدد ده بيكونو بنات مش قلتلكم بلد بتاعة بنات صحيح



سابعا الفيس بوك مش بس صداقات الفيس بوك كمان جروبات

كل حاجة بقى ليها دشليون جروب على الفيس بوك
ده طبعا غير الجروب الرسمى
مثلا الجروب الرسمى للنادى الاهلى وعشاق الاهلى وجمهور الاهلى ومدرجات الاهلى واخبار الاهلى ونجوم الاهلى وكواكب الاهلى ومحبى الاهلى
انت مشترك فى كام جروب كلهم ينتمو لحاجة واحدة ؟



ثامنا الفيس للجميع

( دى بجد حصلت معايا فعلا )
ليا واحد صاحبى علاقته بالانجليزى تحت الصفر
ربنا كرمه وجاب كمبيوتر ووصل انترنت فبيقولى عايزك تعملى اكونت account على الفيس بوك
قلتله مرة واحدة كدة ماشى يا معلم هخلص تنزيل الويندوز واعملك حساب
قالى انا مش عايز حساب انا عايز اكونت
سكت مسبهل بتحمل الصدمة
قالى فى ايه
قلتله حمرا
ماهو اكونت يعنى حساب بالعربى
قالى انا بسمع البنات فى المعهد بيقولو كدة
وطلع معاه اكونتات البنات قبل ما يعرف يعنى ايه فيس بوك
مش قلتلكم بلد بتاعة بنات صحيح