النهارده انا جيبالكم حمام محشى بس بالرز مش الفريك ويارب يعجبكم
نبدء بالمقادير حمام او زغاليل الكميه طبعا مفتوحه
ملح فلفل رشة جوزة الطيب
بصل مقطع وبصله مبشوره
حبهان وورق لورا
2ونص كوب رز
سمنه او زبده
3معالق كبيره صلصه وكوباية زبادى صغيره
الطريقه هنغسل طبعا الحمام كويس جدا بالملح والدقيق من بره وجوه وبعدين هنكتف الحمامه ونثبتها بخله00

هنجيب البصله المبشوره ونشوحها فى السمنه ونغسل الرز ونحطه عليها ونرش ملح وفلفل وجوزة الطيب وحبهان
وهنحط عليها كوبيتين ونص ميه والكبد والاقوانص لما يتشرب تماما نطفى عليه ونسيبه يبرد

ونحشى بيه الحمام من جوه وتحت الجلد ونسيب فراغ علشان ميتقطعش ونخيطه


بعد مانخلص كمية الحمام اللى عندنا هنسلق الحمام فى ميه مغليه ومعاه البصل المقطع وورق اللورا والحبهان والملح والفلفل
وبعد حوالى نص ساعه هنطلعهم فى مصفاه ونسيبهم لحد مايبردو كويس وينشفو

وبعدين هنجيب الزبادى والصلصه ونقلبهم مع بعض كويس



وندهن الحمام من جميع الجوانب بالفرشاه


ونحمره فى زيت غزير وده بعد ما اتحمر


يارب يعجبكم ادوعولى بقى دعوه حلوه ومتنسوش التقييم ياقمرات