عجبي ( 2 )

**nasr** · 26-11-2009, 04:54 PM

عيد .. والعيال إتنططوا ع القبور
لعبوا استغمايه .. ولعبوا بابور
وباللونات .. ونايلونات شفتشي
ولا تختشي يا حزن جنب السرور
عجبي ..صلاح جاهين
مع إن كل الخلق من أصل طين
وكلهم .... بينزلوا مغمضين
بعد الدقايق والشهور والسنين
تلاقي ناس أشرار وناس طيبين
عجبي ..صلاح جاهين
أنا كل يوم أسمع فلان بيعذبوه
أسرح في بغداد والجزائر واتوه
ما عجبش م اللي يطيق بجسمه العذاب
وأعجب من اللي يطيق يعذب أخوه
عجبي ..صلاح جاهين
قالوا الشقيق بيمص دم الشقيق
والناس مهياش ناس بحق وحقيق
قلبي رميته وجبت غيره حجر
داب الحجر .. ورجعت قلب رقيق
عجبي ..صلاح جاهين
غمست سنك في السواد يا قلم
عشان ما تكتب شعر يقطر ألم
مالك جرا لك أيه يا مجنون وليه
رسمت وردة وبيت وقلب وعلم
عجبي ..صلاح جاهين

**خلود** · 27-11-2009, 11:35 AM

كلمات جميله ناصر

بس ياريت تكبر الخط شويه

**fagrmasr01** · 27-11-2009, 11:38 PM

غمست سنك في السواد يا قلم
عشان ما تكتب شعر يقطر ألم
مالك جرا لك أيه يا مجنون وليه
رسمت وردة وبيت وقلب وعلم

الله عليك يا صلاح يا جاهين
تسلم ايدك يا ناصر ع النقل اللى له طعم جميل