يوميات احلى كتكوته

[ghada]

السلام عليكم ورحمه الله

حلوه فكره اليوميات دى وعجبتنى وطبعا انا علشان مش فاهمه يعنى ايه يوميات سالت ماما عليها وفهمتنى قالت لى تحكى اللى عايزه تقوليه لاصحابك فى المنتدى يعنى اقول عملت ايه النهارده بالتفصيل مش تفصيل اوى يعنى علشان مش تزهقوا منى برضو

قالت لى لازم تدخلى كل يوم تقولى حصل لكى ايه على مدار اليوم وطبعا ماما مش هتدخلنى المنتدى كل يوم علشان المذاكره والدروس وكده يعنى

علشان كده انا كل ما اقدر ادخل اكتب حاجه هتلاقونى

ماشى اتفقنا
اعرفكم بنفسى بقى الاول انا اسمى كتكوته طبعا ده مش اسمى الحقيقى ده اسمى هنا على المنتدى لكن اسمى الحقيقى غاده

عندى 9 سنين و7 شهور وفى سنه 4 ابتدائى والحمد لله من كجى وانا بطلع متفوقه فى مدرستى الاولى او التانيه بالكتير يعنى اطلع الخامسه

مامتى عضوه هنا فى المنتدى ويانا وهى طبعا تعرفوها حبيبه قلبى خلود ولى اخت واحده بس اكبر منى وهى شذا

كده انتم عرفتوا عنى اهو حاجات كتيره النهارده

انا بقى بحب مدرستى جدا ومدرسينى كمان ومش بحب اخد دروس ولكن ماما مصممه تدينى درس انجليزى ورياضه مش فاهمه ليه يعنى

بس انا الايام دى بقيت ازهق من المدرسه علشان فيه بنت بتقعد جمبى تضايقنى وتتكلم كتير وكل ما اقول لها اسكتى شويه مش بتسكت

كفايه بقى علشان انا بصراحه زهقت من الكتابه مش تزعلوا منى بس انا بكتب واجبات كتيره اوى وايدى بقى وجعتنى

اشوفكم تانى بقى لو عرفت ادخل بكره المنتدى

بس ياريت توصوا ماما خلود على شويه تسيبنى اقعد كل ما اقول لها تقولى لا لا كده مش بزمتكم حاجه تضايق
بس اوعو تقولها لها كده

يلا سلام بقى

[ah-mo]

كلامك اكبر من سنك مشاء الله يا عسوله ودا اسمكك اللي هسميكي بيه ربنا يحميكي وعاوز اقولك ان ماما عوزاكي تكوني احسن منها لان محدش في الدنيا يحب حد يكون احسن منه غير ابنه او بنته واعلمي ان العلم لا حدود له ومفيش حاجه اسمها تفوق بل اسمها اجتهاد فشدي حيالك شويه في دروسك واثبتي لماما انك اد المسؤليه
ربنا يوفقكك يا حبيتي
عمو احمد

[اميرة حبى انا]

لا ياست غادة
مافيش قعاد
عشان يفضل التفوق زى ماهو

[fagrmasr01]

بس ياريت توصوا ماما خلود على شويه تسيبنى اقعد كل ما اقول لها تقولى لا لا كده مش بزمتكم حاجه تضايق

كتكوتة الكتكوتة
مش هانوصى ماما عليكى عارفة ليه ؟ لأن ماما بتحبك ومتوصية بيكى وخايفة عليكى وعاوزاكى فعلا تكونى احسن واحدة فى الدنيا كلها

تسلم ايديكى يومياتك زى العسل زيك يا غادة
ياللا شدى حيلك وذاكرى وحافظى على التفوق
ربنا يبارك لك وينجحك ويوفقك فى حياتك
ويخليكى انتى واختك لماما وبابا
ويخللى بابا وماما
ويارب ربنا يسعدكم جميعا
آمين

لعلمك بئا
.. هتابع يومياتك ..
لأنها بجد حلوة اوى اوى اوى

[وردة الايمان]

كتكوته ......انا سعيده جدا بيومياتك ...

جميله ..أوى ....أوى .وفكرتنى بحاجات كتير .

كتكوته ...ممكن تعتبرينى ...صحبتك ....؟

هستنى منك رد على السؤال ده ضرورى .

على فكره انا مش صغيره ...انا كبيره ...

بس بحب كل الأطفال الجمال الشاطرين اللى زيك ..

خلاص ..؟ هنبقى اصحاب..؟

انا اسمى ورده .

وده طبعا مش اسمى الحقيقى ...بس لو بقينا اصحاب بجد هقولك على اسمى الحقيقى .

بس ايه صحبتك الغلسه دى اللى قاعده جمبك ......هى اسمها ايه ....؟

انتى ممكن تقولى للمس بتاعتك عليها ...ابقى كلمينى عليها المره الجايه .

مش هطول عليكى بئه ....واسيبك تذكرى ...انا عايزاكى تبقى اشطر من مامتك ..

انا حاسه ان علاقتى بيكى هتكون احسن من علاقتى بمامتك ...بس اوعى تقوليلها ...ده سر .

متنسيش ....مستنيا يومياتك ....يلا بئه .....سلام.



* وردة*