تامر حسنى ..
فى سنة كام بالضبط نال تامر حسنى لقب " مطرب الجيل " وأمتى إنضرب بالأقلام والشلالاليت من الجيل ده فى ميدان التحرير ؟
أذكر عدد الأقلام والشلالاليت اللى حصل عليها ومافيش مانع من أن تُحدد بالرسم على خريطة ظَهر المذكور مواضع ضرب الشلالاليت والأقلام .؟
أنس الفقى ..
بماذا كان يشتغل قبل ما يتولى وزارة الإعلام ؟
هل كان تاجر كتب وموسوعات ثقافية ولا صاحب " دُكان " خُضار وفاكهة أم فقى فى قرافة ؟
زكريا عزمى ..
أعوذ بالله من الشيطان الرجيم .. بسم الله الرحمن الرحيم .. تعرف أيه عن زكريا عزمى ..؟
ويطلع أيه ؟
وبيشتغل أيه ؟
وهو فين دلوقت ؟
أرسم خريطة لمكان تواجده دلوقت دون أن تُبين فيها شكله .. خلى رسمك نضيف !!؟
إختار الإجابة الصحيحة ..:
إسرق لنفسك كما تسرق لأخيك !!
من صاحب المقولة دى .. علاء مبارك أم جمال مبارك ؟
من الهاتف البايخ من بين هؤلاء صاحب مقولة ..:
جوعوا تصحوا ..:
أحمد نضيف .. يوسف بطرس غالى .. محمود محى الدين
" يخرب بيوتهم مطرح ما راحو "
علل .:
ليه كيلو الفلفل الأسود وصل تمنه 200 جنية من بعد ما التسعيرة أصبحت بلا رقابة ..؟
ملحوظة .. ممنوع العطس فى قفا المراقب أو الناظر .
ماذا تعرف عن ..:
تعرف ايه عن كليوباترا .. الملكة مش السجاير
ولع لى وبعدين جاوب .!
يوسف بطرس غالى قابل رشيد محمد رشيد فى مكان ما بالخارج فقال الأول للآخير :
إزيك يا حرامى ..!؟
فرد عليه أهو إنت ..!
أذكر مكان اللقاء بالتحديدج .. دا لو حد يعرف أساساً حتى المُصحح ..!
أى هذه الأشياء أكثر طولاً ..
النخلة اللى بتطرح بلح ولا أحمد نظيف اللى مالوش فى الطرح خالص وإنما بيموت فى الجمع ..!
بعد مناقشة قانون فى مجلس الشعب المُنحل سأل سرور الأعضاء :
اللى نايم يرفع صُباعه ..!
يا ترى كم عدد الأصابع اللى إترفعت ساعتها ؟
" أوعى ما تجاوبش صح وتقول الأغلبية أحسن تسقط والكحك فى الشهادة يبقا للرُكب "
واحد من الدُعاة الجدد أفتى بأن ركوب السيارات حرام شرعاً لأن كل سيارة على حد تعبيره يعنى لها أربع عجلات والعجلة من الشيطان زى ما كُلنا عارفين !
مين العبقرى صاحب الفتوى دى ؟
إيش ياخد المُتفرج من فكر السُبكى فى افلامه .. وأيه علاقة المذكور بالمثل اللى بيقول إيش ياخد الريح من البلاط ..؟
تَمخض الجبل فولد أحمد عز الطبال .. أذكر تاريخ ميلاده !!؟
الموظف اللى كان بيلبس أحمد عز الجزمة كان بيقبض كام .؟
وياترى الجزمة القديمة زى الجديدة ولا واحد بحوافز وواحده بدون دا على إعتبار إن فيهم جزم برباط والتانيين بنص !؟
ويا ترى الراجل ده معاه فى طره ولا بسلامته بيلبس الجزمة لوحده .؟
البوليس ظبط مجموعة من 10 أفراد بيبعوا لحم الكلاب للجزارين على إنه لحم بلدى ..
حاول أن تذكر لنا اسماء " ولاد الكلاب " واحد واحد ومن بعيد خوفاً من الهوهوة أو العض ..!
إشرح النظرية اللى بتقول إن سبب دوران الأرض هو دليل على إنها شاربة قزازتين بيرة ..
ياترى شارباهم فى مكان مُحترم ولا تحت كوبرى ولا فى كافية ريش ؟
زاد وزن محمد إبراهيم سليمان بعد دخوله السجن لما حطوه على الميزان لقوا إن وزنه وصل تقريباً لـ245 كيلو جرام منها
45 كيلو جرام لحم وعضم وجلد والباقى كرش كبير بيضم جواه عمارات وفلل وشقق وقصور
إطرح اللحم والعضم والجلد وقول لنا يبقا باقى كام وزن الكرش العزيز ؟
كانت ممثلة عادية .. ثم إعتزلت .. ثم تَحجبت ..
ثم إنشقت على الحجاب وخلعته ورجعت تمثل تانى ..
جوه الوسط الفنى بينادوها يا حاجة خُلع
وأحياناً بالست عبير صبرى .. !!
عرفتها ولا لاء يا موكوس ..!


" رؤية "