يا صاحبي فوق قصيدة كتبتها لكل مسلم ومسيحي أو كل مسيحي ومسلم نفسي نفوق بقى ونفتكر أن احنا طول عمرنا واحد ...





يا صاحبي قد حان الوقت حتى نفيق من غفوتنا
احذر فالذئب الجريح يبتغي فرقتنا
واليوم يدس أحقاداً كي ننسى معاً غايتنا
حاربنا وقاتلنا معاً كي نشتري حريتنا
أرجوك لا تدعهم يسرقوا منا برائتنا
***
مش فاكر لما كنا في الميدان
اتحدى أنك في يوم تقدر تنسى اللي كان
مع بعض يا صاحبي هدينا حيطان وبيبان
وفي أسبوعين مع بعض برضه غيرنا الزمان
وقدرنا نكسر ظلم عاش فينا سنين
عرفنا كل العالم يعني أيه مصريين
أبدا ما كان بينا مسلم ومسيحيين
طب مين اللي فجر كنيسة القديسين
مش هو نفسه اللي يا صاحبي عاوزنا نبقى اتنين
مش هو نفسه اللي كان فاكر ان انتصارنا محال
مش هو نفسه اللي قال أننا حبة عيال
مش هو برضه اللي قتل سيد بلال
***
تلاتين سنة عايشين ندوس عالجمر
تلاتين سنة سرقوا يا صاحبي العمر
تلاتين سنة نسونا إننا كنا عشرة عمر
تلاتين سنة نسونا أننا مع بعضنا فيها من يوم ما فتحها عمرو
مع أننا انت وأنا من زمان أصحاب
خلونا عايشين في بيت واحد وكأننا اغراب
***
يا صاحبي مين اللي خرب لبنان
طب قولي مين اللي محتل الجولان
أو فكر وقولي مين اللي قسم السودان
طب لما مشينا مبارك مين اللي كان زعلان
دول حتى عاوزين ياخدوا مننا نيلنا كمان
يا ترى لسه أنت مش عارف مين اللي خان
***
يا صاحبي فوق بقى وافتح عينيك
من كل ناحية العدا حواليك
نسوك اخوك علشان تسيب أراضيك
يا صاحبي فوق وشوف في مين حواليك
صدقني يا ابني هما أول ناس هتفرح فيك
***
من صغرنا مع بعضنا محمد ومينا
مع بعضنا نكبر ويكبر حلمنا فينا
راكبين سوا في نفس السفينة
أوعى نغرقها لا يشمتوا فينا
صدقني مهما بعدنا تفضل مصر جوانا
نفدي ترابها بدمنا هي اللي شايلانا
طب قولي أيه من غيرها تسوى دنيانا
أوعى نضيع أرضها دي هي اللي حاميانا
***
يلا يا صاحبي نحط الايد في الايد
يلا يا صاحبي كفاية نعيد ونزيد
أوعاك في يوم تضيع دم الشهيد
وأوعاك في يوم تنسى خالد سعيد


ملحوظة : للتأكيد مرة أخرى القصيدة من كتابتي وذلك حتى لا يتم نقلها إلى قسم روائع منقولة مثل قصيدتي الأخرى طبع العبيد ...