بسم الله الرحمن الرحيم

ازيكم يا اجمل اهلاويه

الموضوع ببساطه هيكون مناقشه بشكل هادي في " نغمة التحكيم " السائده اليومين دول علي لسان المنافسين وهل ليها دور ايجابي او سلبي في المسابقه

كلنا طبعا تابعنا الدور الاول وشوفنا المهازل التحكيميه اللي فيه وازاي فرق خدت نقاط ببلاش من اخطاء تحكيميه مقصوده وغير مقصوده

مثلا زي جون احمد جعفر الشهير في مرمي الاسماعيلي الي اهدي التلات نقاط للمنافس

وزي جون جعفر برده في المقاولين وغيره وغيره

بما ان الاهلي مش بيتكلم ابدا عن الامور التحكيميه ولا عن القرارات ولا غيره لحد فتره قريبه

لقينا بعض الفرق المنافسه طلعت نغمة التحكيم دي وان الاهلي بيلاقي مجامله من التحكيم

في حين ان الحقيقه ان الفرق المنافسه هي الي بتاخد مجاملات كتير اوي من التحكيم

مع تفكير بسيط لقيت ان النغمه دي ليها فايدتين مهمين جدا جدا جدا

اول حاجه ان الحكم المصري اللي بينزل يحكم ماتش للاهلي بيكون مشدود جدا جدا وعارف ان اي غلطه لو مش متعمده حتي هيلاقي اللي مستنيه علشان يقطعه

بالتالي هتكون اغلب قراراته عكسيه علي النادي الاهلي علشان يطلع يلاقي اشاده بيه وبطبيعه الحال النادي الاهلي " مش بيعترض "

تاني حاجه لما يلعب ويحكم ماتش للمنافس بيكون خايف وهو بيحكم لان اي غلطه هيعملها ضد المنافس هيطلع برده بعد الماتش يسمع انتقادات واتهام صارخ ليه بانه بيجامل الاهلي

علشان كده شوفنا معظم الماتشات الاخيره القرارات فيها بتكون عكسيه وممله جدا ومفضوحه جدا علي النادي الاهلي ..

فكان لازم وحتمي ان الكابتن سيد عبدالحفيظ مدير الكوره يطلع ويعلي صوته ويصرخ ويقول ايه الظلم ده علشان الحكام تبدأ تفوق وتعرف انها بتحكم ماتش مش مستنيه اشاده ولا انتقاد من بره


السؤال بقي موجه للجميع اللي يحب يشارك ويجاوب

ياتري انتو شايفين ان سياسة الصوت العالي بتجيب نتيجه في الدوري المصري ؟!!

ولكم كل الود


ملحوظه بسيطه اتمني من الاخوه في الروابط التانيه محدش يطلع عن جو الموضوع لو حد حب يشارك معانا