-- يوم بريحه ..

[شذا]

عارف لما تحس ان يومك كده ليه ريحه ..؟؟

يعني لما تصحي م النوم .. وتفتح شباكك .. وتاخد نفسك ..

وقتها هتشم ريحه .. تفكرك بيوم عشته زمان ..

وتفضل الريحه دي ملازماك طول اليوم

تحس انك مبسوط

كأن اليوم دا فعلا انت عايشه ... مش ذكري اندفنت

لا

حاسس بيه كأنه حاضر .. وعايشه

تقضي يومك كله سعيد بريحه ذكري .. شمتها اول ما صحيت

فكرتك بتفاصيل يوم جميل

بناسه

بأصواتهم

بكلامهم

بسكوتهم

بوجودهم جنبك

احساسهم بيك

بكل حاجه



ويــــــــــمـــــــــر الـــــــــــوقــــــــــــــــت

وف اخر اليوم ... لما تكون قاعد ف اوضتك ... علي سريرك

وترجع ضهرك لورا ... تغمض عنيك .. وتاخد نفس طووووووويل وتطلعه براحه

وبالك مشغول باللي عايشه وسعيييد

وتفتح عنيك

وفجاءه تحس بحزن ... بيقتل سعادتك قدامك

وتتبخر الذكري

تترغرغ عينك بدموع ... ومتنزلش

ويبدأ قلبك يدق بوجع



==== انت فعلا لوحدك ====



وقتها تتمني ان ده فعلا ميكنش ذكري ... بس اهي اماني

مجرد اماني

عارف بقي لما تعيش لوحدك وسط اماني بريحه ذكري يوم؟؟

مش عارفه اذا كان احساس حلو ولا وحش

احساس بجد يخليك مبسوط ولا يوجعك

تقدر تقول احساس قادر يحيك .. ويموتك ف نفس اللحظه

يحيك وانت مغمض

ويموتك اول ما تفتح

وف كلا الحالتين ..

شامم نفس الريحه

سامع نفس الصوت

حاسس بنفس كل حاجه كانت ..

تفتكر وقتها لو اتكلمت .. هتقول ايه ..؟؟

طب ايه اكتر حاجه هتكون محتاجها ..؟؟

عـــــــن نـــفــــســــي

مش هتكلم ... هسكت

ولو علي احتياجي ... هدفنه جوايا

ولو علي ريحه اليوم .. يذكراها .... هستحمل

وهيعدي وهتمر ايام تانيه بدون ريحه .. وعااادي

مش هعيط

وهنام

وبكره هصحي لو شاء ربنا .. وهفتح شباكي

واشم يومي

مش هلاقيه بريحه .. فاطمن انه يوم عادي ..


بس ياتري وقتها هزعل ولا هفرح ..؟

يمكن وقتها احس ان حتي ريحة ايامنا ... بذكراها

قاسيه علينا

بتقسي هي كمان .. رغم انها كان ممكن يكون عندها القدره انها تكمل فرحتنا بدون حزن

وهتنتهي قعدتي معايا .. بــتــنــهيـــــده ... والحمد لله


خلص كلامي ..

[اسامة22]

كلام جميل يستحق التقدير والتحية