السلام عليكم ورحمة الله وبركاته

اتمنى من الجميع يكون بخير ومفيش اى حقد ولا غل وربنا يكفينا شر الحقد والغل

انا مش عامله العنوان ده عشان كل واحد يدخل يقولى باباه يبقى مين

لان متأكده انهم كلهم ناس محترمه وكويسه ممكن قصروا شوية فى تربية ناس

بس مايمنعشى انهم برده ناس كويسين

ندخل فى الموضوع

قبل الثورة لما كنت تيجى تمشى فى مكان وظابط يوقفك ويقولك اثباتك ياض

ياض دى يعتبر بيحترمك وانت تقوله ليه خير يقولك انجز ياض

الناس اللى عندها وسطه بقى كانت بكل ثقة تقوله انت مش عارف انت بتكلم بن مين

او انت بتكلم مين

يقوله انت بن مين بقى ؟؟؟

لما كان يحصل اى خناقة او حاجه وانت تقولهم والله لافرجكم وانا هعمل واسوى

يقولك انت بن مين فى مصر ؟؟؟

وكانت مصر فعلا ماشيه كدا ماكنشى بيقولك انت مين كان كل اهتمامه انت بن مين

عشان من خلال ده يحترمك ولا يديك بالجزمه

وكان فيه ناس بقى تمشى فى الزيطه دى كل ماحد يكلمها يقولك انت مش عارف انا بن مين

يقوله بن مين بقى يقوله واحد ساكن فى المكان الزباله دى وانت ماسكه وشكله متشرد هيبقى بن مين يعنى يا باشا

وياخد على قفاه ويمشى

لما كنا العيلة كلها مسافره وجينا على كمين ووقفنا الظابط بيقول لبابا الرخصه
ماطلعلوش الرخصه طلع الكارنيه اتفضل يا باشا

طيب تعال لو واحد تانى الرخصة واركن على جمب وغير التهزيق والشتيمه

طب ده كله ليه عشان انا ابويا على قد حاله ولا ايه بالظبط

بس هو رجل محترم برده يعنى كان الناس وهى مشايه فى الشارع ممكن تتمسك

عادى جدا تحرى بمزاجه ويعمل فيه اللى هو عايزه

خليهم مسكوا واحد فى المقطم مع واحده فى العربية وطلع بن وزير او بن لوا او بن واحد فى مجلس الشعب

هيروح البيت معزز مكرم ولا كأن فيه حاجه

كانت بلدنا بلد بتاعت وسايط صحيح

طب بعد الثورة ياترى الوضع اختلف لسه ولاد الناس اللى ماسكين البلد يعملوا اللى هما عايزينه

ولا احنا كلنا بقينا ولاد تسعه فعلا ؟؟؟

يعنى اى واحد ممكن لو بن وزير اتخانق معاه الاتنين هيتحقق معاهم

واللى غلطان هيتعاقب ولا هيبقى نفس الوضع اللى فات ؟؟؟

احنا عايزين نحس فعلا بالثورة وانا متفائل خير وكفايه ان الدول العربية بدأت تحترمنا

دى عندى كفايه اوى اننا عملنا اصلاحية بين فتح وحماس اللى كانوا الاول بيقولك دى ميئوس منها

بس برده عايزين نحس ان احنا كلنا واحد فى مصر

مش عايزه واحد تافهه عشان اخوه ولا ابوه ظابط يعملى فيها سبع رجاله فى بعض

طيب يا امور انت فيه اللى اعلى منك اللى يقدر يديك بالجزمه انت واللى يتكلم كمان

وفيه حكمه بتقول
ليس الفتى من قال كان ابى وانما الفتى من قال ها انا ذا


عايزه اعرف

رأيكم فى الكلام ده

ياترى هنسمع كلمة انت بن مين فى مصر تانى ولا خلاص كدا ؟؟

وياترى سمعت الكلمه دى قبل كدا ولو اه كان ردك بيبقى ايه ؟؟؟

وانت بن مين فى مصر


فى رعاية الله