مين ابن اللذينه اللي قال مرايه الحب عميه


 بجد .. نفسي اشوفه .. واحتمال كبير اخدوا بالحضن وابوس ايدو عشان الجمله المانعه الشامله دي .. قمه العبقريه انك تقول حكمه تتناقلها الاجيال عبر الزمن .. اكيد طبعا للمقال ده هدف .. طبعا .. اقولك يا عزيزي العضو الهدف ايه ..
 عندنا في الشارع ولد لذيذ اسمو ك .. ك ده نسخه مقلده – للاسف – من خالد الذكر براد بيت .. شعر بني فاتح وعينين دوبلي وقوام رياضي رائع – بلاش اكمل لحسن تقولو عليا باحسد ولا حاجه وكمان عشان اراعي ظروف جمهور الشباب الخناشير اللي ملين القهوه .. لامؤخذه يا شباب .. وكمان عشان البنات متقعش من طولها انبهارا بالواد ده .. ما علينا –

الواد ك ده كان عاملي عقده نفسيه .. بيتنطط بين جموع البنات بطريقه تخليني اعض النواجز والانامل واللسان كمان .. يعرف كم مهول من البنات .. ويتنقل بينهن من بنت للتانيه .. يعجب بدي .. ويخرج مع دي .. وكلهم بنات على الفرازه يا مبارك والله .. حاجه غريبه تخلي أي حد يحسد فيه ويتمنى زوال النعمه منو بطبيعه الحال ..

 يوم الخميس اللي فات .. وانا معدي جنب احد الكافيهات في الاقصر .. لقيتو خارج ومعاه بنوته .. البنت .. اعرفها .. انا مقتنع اساسا ان الجمال نسبي .. بس يعني .. معلش .. لما ك ده بيعجب ببنت .. بيختارهم على الفرازة الصراحه .. بنات تجبرك انك تبص عليهم .. مكياج ايه وحلاوة ايه وفرنساوي ايه .. ملوش في البشرات القمحيه او السمراء .. واكيد ملوش في الاجسام المليانه

المشكله ان البنت دي تنطبق عليها الاوصاف السابق الاشارة اليها .. اول ما شافوني اتبرجلوا .. انا صراحه في المواقف المحرجه دي باحترم نفسي .. باعمل نفسي مشفتش أي حاجه واخد نفسي واطير .. مشكلتي اني ابن ناس ومش فضحي – بتاع فاضيح يعني .. ولو اني بافضحهم على النت .. ايه التناقض ده .. ما علينا –

المهم خدت بعضي وروحت على البيت اكمني هلكان من عوء اليوم وتعبه وكمان عشان اروح اذاكر – وده موضوع هاحكي عنو بعدين في توبيك تاني لما افوق من هول الصدمه – اتعشيت وقعدت اذاكر .. شويه ولقيت الموبايل بتاعي بيرن .. ك بيرن عليا .. اكيد نفضت عشان انا عارف هيحكي في ايه .. مرة واتنين وتلاته .. وانا منفض .. راح باعتلي رساله ( الباشا الكبير .. عايزك ضروري على القهوه .. انزلي عشان عايزك في موضوع .. ومش ماشي غير لما اقابلك ) .. طب وبعدين .. لبست الهدمتين ونزلت اقابلو .. بس فكرت الاول .. اعمل نفسي عبيط ولا اعمل نفسي حكيم .. ولا اعمل ايه .. ضربت لخمه .. قولت اتعامل مع الموقف بصدق .. والصدق يفرض اني اشتغلو اشتغاله عناب على البنت دي .. بقى براد بيت يمشي مع عائشه الكيلاني .. هل يجوز ..؟؟؟ ده حتى حرام قانونا وانسانيا ..؟؟

المهم نزلت ولقيتو قاعد على الكرسي وهو بياكل السيجاره اكل .. باين عليه التوتر والخوف والقلق .. الصراحه صعب عليا موت .. يا حرام .. الدقايق اللي جايه عليك هتبقى شتراوس الجنزبيل يا ك ..

انا : مساء الفل يا حج
 ك : طيب
 انا : ماشي .. اطلبلي واحد قهوه عشان نظبط المزاج
ك : طيب
 انا : هو انت عليك عفريت اسمو طيب .. مالك
ك : هو انت كنت فين من ساعه
 انا : كنت في الحمام .. في ايه يا عم .. مالك .. قلبت على مخبر ليه
ك : انت شوفتني مع ه .. صح
 انا : غالبا
 ك : يعني ايه غالبا .. شوفتني ولا لأ
 انا : اديك اعترفت .. يعني حتى لو مشفتكش اديك اعترفت .. ودي بنت تمشي معاها يا ماو
 ك : بص .. انا هاقولك على حاجه بس سر
انا : قول
 ك : احنا بنحب بعض
انا : انتو مين بالظبط
 ك : انا وه
انا : يا راجل
 ك : اه
 انا : بتحبو بعض وبس
 ك : واتفقنا نتجوز
 انا : يا راجل
 ك : واتفقنا على كل حاجه .. ورايح اتقدم بعد كام يوم
 انا : هو انا كل شويه اعتر في مشكله زي دي .. بص
ك : بص انت .. المشكله مش في الشكل
 انا : اه .. المشكله في المضمون
ك : صح
 انا : صح ايه .. المهم الشكل والمضمون يا عم الصايع .. مالك .. هو انت قلبت على افلاطون ليه .. مش انت اللي مقضي حياتك في الشكل .. دانت حتى عمرك ما حاولت تنمي مضمونك .. انت طول عمرك وانت مقضيها تقص في الشعريات وتوضب شعر صدرك وتلمع وشك ..
ك : بس ده ميمنعش اني كنت بدور على المضمون طول عمري وملقيتش حد يجرني من قفايا ويعجبني
انا : يا راجل .. و ه بس هي اللي جرتك من قفاك ..
ك : عجبتني
 انا : دي ضربتك على قفاك يا ك .. يا حج دي سمرا
 ك : وانا بحب السمر .. السمر نص الجمال
 انا : اه .. وتخينه
 ك : وايه يعني .. بحب الجسم ده
 انا : يا راجل .. دي اتخن مني اساسا
ك : مش مشكله
 انا : لا مشكله يا حج .. هتمشو مع بعض ازاي في الشارع ..هيبقى منظركم ايه في الكوشه
ك : عادي .. المكيب هيحل المشكله
انا : يا راجل .. وفي البيت .. الميكب هيحل المشكله .. احساسك ايه وانت نايم جنبها على السرير .. منغير ميكب ..شعورك ايه وجنبك مقطورة جاز بتشخر وبترج السرير ..
ك : ولا أي حاجه .. الحب مش بالشكل ..
انا : اه .. مرايه الحب العميا
ك : بالعكس .. مرايه الحب بتبين من بيحبك ومين مش بيحبك
انا : ايه يا عم الكلام الكبير ده ..انت اساسا فاهم معناه ايه
ك : طبعا
 انا : بص .. انا عارف ان اللي بره العركه شديد – مثل صعيدي زي اللي ايدو في الميه مش زي اللي ايدو في النار – بس ..
 ك : منغير بس .. انا منزلك من فوق عشان اوضحلك احنا كنا بنعمل ايه
انا : لا وانت الصادق .. انت منزلني عشان تشرحلي سبب وجود الورد مع الخيش
ك : احترم نفسك
 انا : ما علينا .. ربنا يوفقكم .. انا بهزر يا ريس .. بس بجد .. انت مقتنع
ك : اه مقتنع
 انا : متاكد
 ك : اه
 انا : خلاص .. ربنا يهني سعيد بسعيده .. السلام عليكم
 ك : وعليكم

 قفلت راجعا الى المنزل ولساني يردد .. فعلا مرايه الحب عميه .. هو الانسان ساعه الحب بيبقى فعلا ضرير .. او على راي الامام الشافعي .. وعينُ الرِّضا عن كلَّ عيبٍ كليلة ٌ وَلَكِنَّ عَينَ السُّخْطِ تُبْدي المَسَاوِيَا .. احتمال بردو .. هو الانسان ممكن يضحي بحاجات كتير عشان اللي بيحبو .. التضحيه دي توصل لدرجه انو ميشوفش اللي بره .. ويبقى باصص بس للي جوه .. ايوة يعني .. مع احترامي .. هل الشكل مطلوب وبس .. ولا المضمون مطلوب وبس .. ولا لازم يبقى فيه توازن بين التنين .. لازم الشكل والمضمون يبقوا سوا شروة واحده .. ولا عبد الوهاب كان صح لما غنى .. وعشق الروح ملوش اخر .. لكن عشق الجسد فاني ..غلبت انا .. وغلبتني المذاكرة ..