السلام عليكم ورحمة الله وبركاتة






الشعب يريد اسقاط كبير الاطباء الشرعيين




اللى شاهد حلقة اخر كلام هايتفق معايا على اننا لو خرجنا بثورة من اجل اسقاط النظام
فلابد من اسقاط السباعى للاسباب التالية :-




1- فى تقرير كبير الاطباء الشرعيين عن صحة الرئيس المخلوع ذكر انة عندة الارتجاف الاذينى .
ودكتور السباعى قال انة يعتقد ان الرئيس يعانى من الجزء الايمن والمفاجأة الكبرى بالنسبة ليا
لما دكتور قلب دخل على مكالمة تليفونية
ان
الارتجاف الأذيني لا يختص أحد الأذينين في عضلة القلب بل إنه يشمل كلا الأذنين الأيمن و الأيسر معاً.

مش زى ما قال كبير الاطباء الشرعيين اللى هو مكلف بالكشف عن صحة الرئيس ومش مصر بس ولا العالم العربى اللى منتظر نتيجة تقريرة لا دة كل العالم



2- لما سئلة يسرى فودة ألم تتحدث مع مبارك اثناء فحصه ؟
رد علية بكل غطرسة لا لم أتحدث معه، لقد كُلفت بفحصه و ليس بالحديث معه
ولما سئلة فودة ازاى تكشف على مريض من غير ما تسئلة عن اللى تاعبة ؟
قال انا معايا اخصائيين كل واحد شغال فى مكان محدد وهما سئلوا وانا سمعت الاجابة منة

الصراحة مش اتفاجئت للمرة التانية لما ظهر للجميع ان السبااعى مش يعرف حاجة عن مدى صحة قلب الرئيس المخلوع ولا عن شرايينة
بس سؤال يادكتور سباعى
ازاى كتبت التقرير وقلت ان حالتة لا تسمح بنقلة ؟
ولا هو التقرير اتكتب ازاى اساسا ولا مين اللى كاتبة ؟؟


3-السبب الثالث والرئيسى واللى كان سبب قدوم السيد السباعى للبرنامج
هو ان حضرتة سلم جثة لاب بعد ما عملوا له الحامض النووى وطلعت النتجية انها مطابقة
وبعد ما استلم الشخص دة الجثة اللى المفترض انها تكون ابنة ودفنها
اكتشف بعديها ان ابنة لسة عايش وموجود فى السجن
وانة دفن حد تانى

طيب ازاى يادكتور طلعت نتيجة الحامض النووى مطابق ؟؟؟



4- ان السباعى سلم جثة لبلطجية اتهجموا على المستشفى بالسلاح الابيض علشان ياخدوا جثة مش بتاعتهم على انة اخوهم :Jumpy:

اولا الدكتور قال فى الاول انة تعاطف معاهم
ورجع قال انهم كان معاهم سلاح ومافيش حد يحمية ولا يحمى باقى الاطباء منهم
وهو اجرى تحليل الحامض النووى لاربع مرات وكل مرة يتأكد ان الجثة مش بتاعتهم
فاقترح انة يسلم لهم الجثة على سبيل الامانة
سبيل الامانة يا سباعى ؟؟



5 - السبب الخامس هو سبب قديم شوية لكن مهم بالنسبة لكل مصر ويمكن كان سبب رئيسى فى قيام ثورتنا
هو الشهيد خالد سعيد
اللى الاخ السباعى لحد دلوقتى مصمم انة توفى بسبب لفافة البانجو
طيب زمان كنا بنقول بتنفذ قررات امن الدولة
دلوقتى بتنفذ قرارات مين ؟؟
ولا هو العند والغطرسة اللى عندك مش عارف تتغلب لسة عليهم

حسبنا الله

ونعم الوكيل

ثورتنا قامت علشان تقضى على الفساد والاستخفاف بعقولنا
مش قادرة افهم حد زى السبعاوى دة لسة فى مكانة لحد دلوقتى ازاى ؟؟



وفى النهاية
انت مع ولا ضد الاقالة الفورية للسبعاوى ؟؟