سيادة الرئيس ...
سيادة الرئيس ... ...ارجعلنا
مش إنت واحد مننا ؟
و عمرك في يوم ما سرقتنا
و لا خدت مليم مننا
ما تيجي طب ترجعلنا
......تقعد بأهلك وسطنا
أهو مرة تاكل أكلنا
و تلبس يا خويا من لبسنا
و تعيش في حارة أو في شارع زيينا
قلت إيه ؟؟ يا حارق دمنا
***
سيادة الرئيس ... ارجعلنا
و غداك يا سيدي عندي أنا
رز و بطاطس مسرطنة
لحمة ؟؟ ... مفيش من سنة
فاكهة ؟؟ ... تعيش إنت و أنا
و الشاي .. بآخر معلقة من السكر إللي كان عندنا
اشرب و فوق و ركز بقى .. علشان نكمل حكيّنا
***
سيادة الرئيس ... ارجعلنا
مش سبت الحكم .. لأجلنا ؟؟
ما تيجي تسمع حكمنا !!
أفكرك ؟؟ و لا إنت فاكر زيينا
قطر اتحرق من كام سنة
و غازنا إللي طار من أرضنا ... لعدونا
و عبّارة مللي بيغرقوا ..!!
غرقت في عرض البحر و راحوا أهلنا ...
و الجاني فلسع مننا
و مركبة بأحلى شباب ...
ييجوا من إيطاليا غرقانين ..
و القرش ياكل لحمنا
و الله كانوا زيينا
و يمكن أحسن مننا
ليهم بيوت و ولاد و عيشة و حلم .. زي حلمنا
اتغربوا و اتبهدلوا ..
لما الفساد طال كل حاجة في أرضنا
و إللي ما ماتش .. قاعد في غربته ..
و الغريب بيذلنا
أقول كمان ؟؟ و لا كفاية ...
و أهو إنت عارف عننا
اصبر هتسمع حكمنا
**
سيادة الرئيس ...
ارجعلنا
و لو إنت واحد مننا
فعلا يهمك أمرنا
بينا عالنائب العام .. تفتنله على ولاد الحرام ...
مصوا بلدنا و دمنا
و افتن دي فتنة مهيش حرام .. ده حقنا
دا لو إنت واحد مننا
اصبر هتسمع حكمنا
***
سيادة الرئيس ... ارجعلنا
اقعد معانا و زيينا
هعرفك .....
دي (أم خالد) أمنا
و دول أهل (سالي) أهلنا
و (عمر بن بنونة ) إبننا
فسر و احكي و قوللهم .. و قوللن
و استسمح الروح إللي منورة في الجنة عند ربنا
هتقول مكنش قصدنا ؟؟
دول ماتوا غصب عننا ؟؟
كداب و فاجر .. و إللي يصدقك زيك .. و الكدب ريحته منتنة
تتشل إيد إللي ضرب .. و إللي أمر .. و عليكوا لعنة ربنا
اصبر هتسمع حكمنا
***
أيوه بقول ارجع لنا
ياللي سرقت حلمنا
و غربتنا و نهبتنا ... و في كل حتة أهنتنا
إحنا إللي سال دمنا
في الأربعين و اسكندرية و التحرير يشهدلنا
آدي القفص ... أقف هنا
و الشعب يحكم .. مش أنا
صدقني ... هي بيّنة
من فوق سبع سماوات .. قالها ربنا
العين بالعين و السن بالسن ...
و هو ده بقى حكمنا ...
و مفيش غيره عندنا
رد مع اقتباس
المفضلات