ماشاء الله ........ربنا يحمي شبابنا وبناتنا ......... حاجة تغيظ

[قموره]

بقالى مدة بفكر في الموضوع ده وأخيراً قررت أكتب فيه

في ظل التقدم والتكنولوجيا والحاجات الحلوة الكتير اللى حوالينا دى ( اشي دش وموبايل وانترنت وانفتاح عالمي)
نلاقي صور وحاجات غريبة بتحصل لا وبتتكرر كمان
في وقت بقى التمسك بالقيم والاخلاق دقة قديمة وبقى صعب أنك تشوف براعم الايمان ( الاطفال ) اللى لسة فيهم البراءة بتاعت زمان!!!!
زى ما يكون العيال بيتولدوا وهما عارفين وفاهمين كل حاجة
راحت البراءة وراح معاها حاجات كتير
شايفة ناس من اللى بتقرا مش مقتنعة ومش مصدقة ( على فكرة ده مش بس الاطفال لا والشباب كمان )
فيه صور مختلفة بتأكد ده
كله بالأدلة اه انا مبجبش حاجة من عندي

طيب نسيب الاطفال على جنب دلوقتى ونتكلم عن الشباب والبنات
من يومين شفت فيديو زى مسابقة كده كانت المذيعة بتسأل البنت ولا الشاب من دول 3 اسئلة

السؤال الاول :
عاوزة اسامي 10 من المطربين
تلاقي الواد من دول بربنت يرص الاسامي مفيش اسهل من كده

السؤال التانى
عاوزة اسامي 10 من لاعيبة الكرة
وهووووووووبا الاسامي تنطلق من لسانه كطلقة المدفع

السؤال الثالث
عاوزة اسامي 10 من الصحابة
ويادى الخيبة على الاجابات المختلفة
حاجة تخلى الواحد يشد في شعره
الواد اللى كان طلقة كلام من شوية..... دلوقتى جاله خرص مفاجيء ويتهته ويستغرب وكأن المذيعة بتكلمه عن تفاصيل الطاقة النووية مثلا
وعلشان متقولوش انى ظالمة ولا حاجة
المذيعة جابت كم آنسة كده محجبات وسألتهن نفس الاسئلة وماشاء الله
تقولش البنات غاشين الاجابة من بعض
اول سؤالين تمام وتيجي في التالت وتخرص فجأة
بس للامانة فيه ناس برضو جاوبت .......اه احنا مش بنفتري على حد
بس يا سلام على الاجابة
جابوا صحابة تأليف كده اهو يبقى اسمي موقفتش ساكت برضو

أنا افتكر مرة بابا _الله يرحمه _سمعني أنا وأخواتى بنتكلم على أسامي اولاد عمرو دياب
فنده لنا وقال برافو عليكم شطار
كل واحد فيكم بقى يا حلوين هيقول أسماء أولاد النبي ( صلى الله عليه وسلم ) من الذكور والاناث
واللى هينسى اسم هينضرب بعدد حروفه

ايه ده لا محدش يبص البصة دى

طبعا وقتها انضربت
بس مش هقولكم كم عصاية
الكلام ده كان زماااااااااااان اوى
وبغض النظر عن العلقة الا انى استفدت جدا وحفظتهم عن ظهر قلب ( ده انضربت عليهم انساهم ازاى بس )

نيجي بقى لاسئلة الموضوع

- ايه رأيك في الكلام ده ؟

- لو كنت في البرنامج ده اجابتك هتكون زى أخواتنا دول ولا هتختلف؟
- ازاى ممكن اننا نزود الوعي الديني والمعلومات الدينية عند قطاع الشباب؟ ( حلوة قطاع دي )

معلش بقى طولت عليكم

[الرومنسى]

فكرة جميلة يا قمورة
لكن معلش مش كل الشباب زى بعض
على فكرة انا من الصنف الاولانى
احسن تفتكرى ان على القبة شيخ
بس للأمانة مش الكل كدة
وزى ما فيه شباب زيي
فيه شباب ربنا كارمهم
تحياتى لكى سيدتى
وربنا يهدينا جميعا

[nogafoda]

شوفو بقي في حاجات كتير كويسه ممكن نعملها
اولادور تحفيظ القران بقت منتشره في كل مكان
وكمان المسابقات الدينيه البسيطه
والاهم من كده القدوه
ربنا يبارك في اولادنا ويحميهم ويحفظهم من كل سوء