مع انتهاء الرئيس المخلوع حسني مبارك من كلمته التي بثتها فضائية العربية أمس ، تفجرت شلالات النكتة المصرية ، و هذه بعضاً منها :

- عاجل بعد كلمة مبارك .. النائب العام يجهش بالبكاء و يأمر بالتحفظ على أموال خالد سعيد .

- مبارك : أنا أدمن كلنا خالد سعيد !
(انت ادمنت النهزيق والتريقة عليك)

- مبارك : الإخوة المواطنون . أبناء مصر الشرفاء .. هرجع من أجلكم أنتم … نياهاهاهاها " ضحكات شريرة متقطعة " .
(ياريتك كنت حكمت اسرائيل 30سنة وضربتنا احنا)

- المجلس العسكرى ينفى خطاب مبارك و يؤكد لا توجد قناة اسمها العربية اصلا ، و دى إشاعة من فلول النظام المخلوع !
(فلول وفلافل احنا ناقصين لبخة في الكلام)

- من مبارك الي المجلس : شكرا على حسن تباطؤكم معنا ، الفلوس في أمان و السنجة في الرنجة و فتشنى فتش !
(لو وقعت في ايدي وربنا هكمرك)

- المجلس : خلاويص ؟ مبارك : لسه , المجلس : خلاويص ؟ مبارك : لسه , المجلس : خلاويص ؟ مبارك : خلاص !

- شرم يا مه يا بهية .. يا أمو بسين و شمسية .. فيكي مبارك و الحرامية .

- من إسعاد يونس لمبارك : شلت المرارة .. عاوز تفقع لي ايه تاني ؟!
(مش ناقص غير ال........... باقي الاعضاء)

- الفنان محمد حسني مبارك .. أوسكار فقع مرارة الشعب !
(بجدارة مع مرتبة الشرف)

- مبارك : يحز في نفسي ما ألاقيه من بني وطني من حقد على القصر اللي مأنتخ فيه !
(طول عمرنا شعب حقود وظالم)

- مبارك : متصدقوش إذاعات هذول الكلاب أنا مسرقتش 70 مليار هما 67 بس !
(اه ياابن التييييييييييت)

- مبارك : القذافي طلع على التوك التوك .. انا طلعت على " العربية " !
(عقبال ماتطلعوا علي الطرب انتوا الاتنين)

- مبارك : جمال ايه اللى تحققوا معاه .. من أنتم ؟!!! .. من أنتم ؟!!!
(شكلك الشعب هيمشي معاك سنجة سنجة)

- رداً علي جمعة الزحف لشرم ، مبارك : لو جايين بجد .. هاتوا معاكم دراع بلاي ستاشن زيادة !

- مبارك : مستر إكس.. مش ممكن يموت !

- مبارك : اعزائي المواطنين ، بصوا العصفورة ! سلاموا عليكوا !

- - مبارك : أعلن أنه ده أول سنجل لي .. و ناوي أعمل ألبوم تسجيلات كامل و بنتفاوض مع روتانا !

- انه لا يموت .. انه يذكرنى بابراهيم الابيض !!!

- مبارك : أظـنّ إتسلّيتو بما فيه الكفاية و أنا خدت أجازة كويسة .. نكمّل بقي مدة رئاستي السادسة ؟

- مبارك : لم أكن أنتوي ... أن أشم النسيم لوحدي في شرم يلا تعالوا بقى !
(جايين مستعجل علي قضاك ليه)

- مبارك للشعب : يا نعيش مع بعض حبيبي يا نموت احنا الاتنين !
(يانعيش عيشة لوكس يانركب كلنا وانت اولنا في البوكس)

- مبارك :‏ إنتو فاكرين الثورة أثرت عليا ؟ أبسلوتلي ..‏ أنا اللي أثرت ع الثورة ..‏ الثورة عملتلي دماغ و دماغ جامدة كمان !

- مصر دلوقتي عاملة زي أوضة واحد عازب ، كل حاجة مش في مكانها ، القميص في التحرير و الشبشب في مصطفى محمود .. و " الجزمة " في شرم .

- مبارك : حطلع خطاب تاني فيديو مع يسري فودة .. بشرط عدم حضور الأسواني !

- مبارك : انا طاهر و حفضل طول عمري طاهر .. طاهر " موسيقى يا ام المطاهر " !
(ياام الطاهر رشي الطاهر 70مليار)

- مبارك : أنا مش حرامى .. انا مش خرونج .. انا كينج كونج !
(انا عيل كاورك
ومتربي في سيرك
)

- مبارك : الواد جمال ده مش ابني .. لقيته و هو صغير قدام باب المطار !
(العيلة كلها شوارعية)

- مبارك : بلاه جمال.. خدوا علاء !
(طب ماربنا ياخدكوا كلكم احسن)

- مبارك : لو كنتم اجتهدتم زى جمال .. كنتم حوشتوا من مصروفكم زيه !
(هو المعدول ابنك سابلنا حاجة ده غلبتوا فيري في تنضيف)

- مبارك : إن كان على سوزان أطلقها .. أنا ماليش غير الإخوة والأخوات !

- مبارك : لن ينعم المصريون بالأمن .. حتى نعيشه واقعاً في شرم !

- هزة أرضية بمقدار 13 ريختر تضرب السودان .. جيولوجي يرجع السبب لـ " صوت إسكندراني جماعي " من المصريين بعد مبارك !

- ثوار يناير يخشون موقعة " المايوه " من جمعة الزحف في شرم الشيخ !