ماتستغربش



ماتستغربش أتغيّر..
وتضّايق وتتحيّر..
رفضت خضوعى ليك دايماً وتوبت خلاص..

مايستحملش إحساسى..
يدوم صبرى وإخلاصى..
وانت هاملنى أو ناسى إن فيه إخلاص..

لو انت مكانى تعمل ايه..
لو اللى تحبه مش وياك..
وانت تدوب وروحك فيه..
وهوه أنانى وبينساك..

ورغم دا كله متحكم وبيهيمن على دنياك..
لا بيسيبك تقول شكوى.. ولا تحكيله إيه جواك..

ولما ساعات عينيك تبكى.. يهدد إنه راح ينساك..
حتى الدمعه يمنعها.. ومانع تشتكيله آساك..
دى يبقى حب يعنى بجد.. ولا عذاب بيستناك..
ماتستغربش قلبى يقول ويتكلم..
لإمتى سكات..
لإمتى لوحدى اتألم ..وإحنا بعاد..

لا بتداوى ولا تصالح ..ولا تهنى ولا تصارح..
ولا بتسأل عن إمبارح..
ونمت الليله أو لسه ماشفت النوم من امبارح..

ماتستغربش مش فجأه ابتدا التغيير..
انا اتحملت وعشانك صبرت كتير..
وانت مش واخد بالك ..ودا تقصير..

لحد شعورى مااتعلم يرد عليك..
وشفت ضرورى أتكلم واحرك فيك..
تدوق من وهمك اللى ماليك ..
حعيش طول عمرى ملك ايديك..
خلاص بطلت احايل فيك..
ماتستغربش..