من مساوىء الثوره (1)!!!!!!!!!!!!!
رغم نجاح الثوره المصريه الا انها كانت ليها مساوىء وسلبيات كتيره جداً خد عندك ياسيدى
--الثوره مثلاً حرمتنا من غاده عبد الرازق بسبب تأييدها للنظام السابق فبطلت تطلع فى التليفزيون ودى بأمانه ومصداقيه وشفافيه كانت تعتبر الحاجه الطريه اللى بتطرى على مراوح الواحد فى الصيف وبديلها شقه بطيخ فدلوقتى مبقاش حاجه لينا تطرى على مراوحنا فى الصيف عشان كده انا بطالب بعوده غاده عبد الرازق فى الصيف او تخفيض سعر البطيخ
--الثوره مثلاً حرمتنا من الكوره الحاجه اللى الواحد كان بيحس فيها بأنه راجل اقتصادى من الدرجه الاولى وخصوصاً لما كان حد يسالنى ايه رايك لو شيكابالا ياخد 50مليون او ابو تريكه 70مليون ارد انا وانا قاعد على القهوه فى شبرا وصوابعى خارجه من الشراب (والله يستاهلهم) الواد ده لعيب وجبلنا كاس الامم وهو اللى فرح الشعب وقالهم نكت وزغزغهم وبص ابو تريكه ينبوع حنان وهو رايح يبوس مرضى المستشفيات والبوسه مش على وش الولد لا البوسه فى وش الكاميرا ياسلام ياعمده
--الثوره مثلاً خلت اسعار السوسيس نار جداً ودا بسبب المظاهرات والثوره اللى قامت فى محافظه السوسيس اللى كانت بتنتج السوسيس وتوقف عمال المصانع فى المحافظه عن انتاجه وانا من هنا بحذر من خطوره الموقف ان عدم وجود سوسيس فى مصر سنصبح بلداً متخلفه وهيؤدى ذلك الى نشوب نزاعات قبليه وطائفيه بين الشعب وقبل الثوره كانت الحكومه بتوفر المخزون الاحتياطى من السوسيس على حساب القمح لان معروف ان القمح هو لقمه عيش ودى هتكفى انما المصيبه ان السوسيس لن يكفى حاجه المواطن **نناشد حكومه شرف بتوفيره والا ستحدث المجاعه
--من اخطر واكتر مساوىء الثوره ان قناه الجزيره تمكنت باللغه العربيه انها تسيطر على كل الشعب المصرى فتلاقى مثلاً راجل يكلم مراته زى نظام المراسلين الصحفييين لقناه الجزيره
---قولى يا لواحظ ماا يحدث عندك الان فى المطبخ؟
----الان ياسيدى الزوج الطبيخ على النار والشعريه بتتسوى والكل يطالب باسقاط طشه التقليه فى الطاسه
شكراً لواحظ على ما قدمتيه
---كان معكم لواحظ عبد النبى العفش
مطبخ العيله بمساكن الدويقه
--من مساوىء الثوره اقامه اللجان الشعبيه فى الشوارع
كل واحد كان معلم لم الصنايعيه بتوع الورشه وتقمص دور ظابط الدوريه الراكبه وعمل كارته وكمين تحت البيت على ناصيه الشارع وطبعاً كان بيحصل خلافات ما بينهم فيحدث انقلاب داخلى فيجى ناس منهم زعلوا من المعلم يروحوا يعملوا كمين قبليه بعشره متر عشان يفتشوا العربيات وطبعا ياويلك لو راكب عربيه ومعاك رخصه لان الرخصه عليها ختم النسر فلو وريتهاله هيدور فيك ضرب لانه هيفتكر انك ظابط والختم اللى على الرخصه ده رتبتك
والى لقاء اخر هكمل مساوىء الثوره اللى مشفهاش حد ودى كانت الحلقه الاولى
--
رد مع اقتباس
المفضلات