الحل فين ومين وازاى وامتى؟؟؟؟؟؟

[اميرة حبى انا]

السلام عليكم ورحمة الله وبركاته
ازيكم
عاملين ايه
ورمضان كريم
وكل سنة وانتو طيبين
ممكن اسأل ليه؟؟؟؟؟
بس حد يرد
والحل؟؟؟؟؟
حد عنده حل؟؟؟؟
انفلونزا طيور

وبتقولوا زادت فى مصر عشان الحكومة معرفتش تلم الموضوع
طب انا لما فكرت شوية لقيت مينفعش الحكومة تدخل كل البيوت اللى مصر عشان تشوف الناس اللى مربية الطيور ومخبياها تحت السرير
ونايمة معاها فى نفس الاوضة
وسايبة ولادها بتلاعبها وتمسكها وشفت عيال بتبوسها على فكرة
هنقول لازم الحكومة تعمل حاجة توعى بيها الناس
عملت اعلانات فى التليفزيون
وعملت خط ساخن للابلاغ عن اى حاجة او اى مكان فيه طيور وانا نفسى اتصلت بيهم مرة بلغت
يبقى مين الغلطان ومين السبب فى الانتشار الفظيع لانفلونزا الطيور فى مصر
اسأل تانى ليه؟؟؟
وايه الحل؟؟؟
انفلونزا الخنازير

حاجة كده من الهوا
مرض وصاب الدنيا ياعينى
بس علاجه سهل
والوقاية سهلة
بس انتشر
ليه؟؟؟؟
الحكومة برضوا
طيب
الحكومة هى اللى قالت لما تلاقى المترو مافيش فيه مكان اوعى تستنى اللى بعده

لأ
اتحشر فى وسط الناس والنفس والخنقة
والاتوبيس

والله فى ناس بتقف فى الميكروباص كمان

دكتور قالى لو لابسة كمامة او حاطة منديل على الفم والانف عمرك ماتتعدى
طيب مافيش عندنا مخ ما نشتريها ولا مستنين الحكومة تقولنا روحوا اشتروا الكمامة لحسن تتعدوا
فى اعتراض على المدارس اصل مدارسنا وحشة مش مستعدة للكارثة دى
ماهو يا سادة مكنش فى انفلونزا خنازير هتستعد ليه بقى
شفت وزير الصحة بنفسى وهو بيقول انهم خايفين ان التلاتة انفلونزا يتحدوا مع بعض فى الشتا ويعملوا حاجة رابعة ملهاش حل
طبعا قصدى الانفلونزا بتاعة البشر والطيور والخنازير
كل الكلام ده فضفضة
حاجة جوايا وحبيت اقولها
شايفة الناس زعلانة من الحكومة اوى وانها معرفتش تلم المواضيع
لما نبطل نربى فراخ ونخليها تنام جنبنا ونبوسها
(والله البياعة فى السوق ماسكة الفرخة قالتلى دى حبيبتى وباستها)
لما نبطل ندخل فى وسط الزحمة ومنعملش من نفسنا اى حاجة نحمى بيها نفسنا من انفلونزا الخنازير
لما نفكر بعقلنا شوية ونبطل التواكل اللى احنا فيه
يبقى ربنا يحلها من عنده
ما هو المرض ابتلاء
وفى فرق بين التوكل والتواكل
لما نعمل اللى علينا من غير مانستنى الحكومة
(ماهى مش هتطهر الجو وتشيل منه انفلونزا الخنازير مثلا)

يبقى ساعتها نرفع ايدينا وندعى ونقول
اللهم ارفع عناالبلاء
اللهم ارحمنا برحمتك
اللهم ارفع غضبك عنا

ياريت الموضوع ده ميعملش خناقة عشان انا معنديش دماغ ولا وقت للخناق
مش
منقول

[خلود]

والله يااميره انتى عندك حق فى كل اللى قلتيه

وبالنسبه لى انا معنديش اى اعتراض على سياسيه بلدنا فى اداره الازمه

وهى تعتبر ازمه على مستوى العالم مش بس بلدنا بس الفرق ان الناس بره عندهم وعى لما يقولوا ابعدوا عن اللى يجيب لكم الامراض بيبعدوا اما احنا فى بلدنا بنحضن الفراخ وننيمهم جمبنا كمان

محبه بقى عشره متعرفيش ايه السبب

اللى انا شايفاه ومن خلال متابعتى لموضوع الانفلونزا ان الحكومه بتحاول وباجتهاد تحتوى الازمه

بس واضح اننا مش بيعجبنا العجب ولا الصيام فى رجب

انا برضو مش عايزه خناق انا برد على كلامك وبس

موضوعك مهم جدا وفيه كلام كتير
شكرا اميره

[fagrmasr01]

فعلا
لازم نفكر بعقلنا شوية ونبطل التواكل اللى احنا فيه

وندعى ربنا ان يلطف بينا فيما جرت به المقادير

موضوع ممتاز
تسلم ايدك يا أميرة

[اسامة22]

موضوعك قيم الي ابعد الحدود
جزاكي الله عنا كل خير
ولكن انا معترض معاكي شوية
وفيها اية لما الواحد ياخد الفرخة في حضنة ويبوسها وتنام معاة مش يمكن الواحد بيحميها من الانفلونزا
مفيش فتوي من الفتواي الكتير بتحرم بوووووووس الفراخ
وربنا يجعلة عامر

[lionking]

موضوع جميل جدا يا اميرة

وان شاء الله محدش يتخانق ولا يتقمص من حد

بس انا بقول ان المشكلة متبادلة بين الحكومة والشعب

الحكومة هيا اللى علمت الشعب العادات السيئة والسخيفة دى

علمته انك لما تتخرج تستنى تعيين الحكومة علمته انه يعمل عبيط ويكبر دماغه والحكومة هيا اللى هتحل المشاكل

اصبح شعب متواكل وكسول

ده حتى مش بيحاول يشغل مخه شوية

ولا بيحاول يغير تفكيره وثقافته

والله مرة بسال مراة البواب اللى عند ماما وآخرة تربيتك للبط ده ايه؟؟

تقولى ايه

بطيبة وحلاوة الفلاح المصرى

البط ده عينا وعبادتنا احنا منغيره نموت

طب الناس دى مش هينفع معاها ولا حكومة ولا حتى معجزة

نيجى بئه للكمامات والحلاوة بتاعتها وكل دكتور براى وكل شركة براى

وفجاة يظهر مسئول حكومى ( اللى هو بابا بتاع الشعب) مدام فى الحكومة يبقى بابا

قووووووم لما يظهر فى البرامج يقول ان الشركات استغلت الموضوع واخدت موضوع الكمامات ده تجارة

وطبعا بما اننا شعب ابوى ولازم يكون فى حد بيقكر لنا يبقى هنسمع كلام عمو اللى بيلف على القنوات وطبعا مش هنشترى كمامة

وفضلوا يقولوا الموضوع تحت السيطرة تحت السيطرة لحد ما اتفقسوا خلاص

ومش عارفين يتصرفوا فى المدارس

طب ايه لازمة اللف والدوران من الاول

ونقع فى حيص بيص

باختصار

عشان نحمى نفسنا من انفلوانزا الخنازير

كل واحد مع نفسه ومع ولاده

النظافة اهم حاجة

عدم البوس والتواجد فى اماكن مكتظة زى المترو والاتوبيسات

لبس كمامة


وبعدين احلى حاجة فينا كمسلمين بلاش كمصريين عشان محدش يزعل
اننا متواكلين

نقول ايه

خليــــها عـــلى اللــه

شــكــرااااااا

وياريت فعلا محدش يتخانق مع حد