ربنا يعوض على مصر و المصريين و مبروك للاخوان المسلمين و هارد لاك لشباب الثورة

[خلود]

انا جايه
بقول يا جماعة مبروك للاخوان المسلمين و الحزب الوطنى و هارد لاك و حظ اوفر فى المرة القادمة لمصر وشباب الثورة و عقبال ما نتقابل ان شاء الله فى ثورة تانية بعد 30 سنة ان شاء الله
الموضوع النهارده عن التعديلات الدستورية

يا ريت بس لو تقروه للاخر و تستحملونى لانى انا مالونتش الكلام انا اسفه لانى بجد حزينه و مهمومه و هاتفهمو كل حاجه لما تقروا الموضوع


نتيجة التعديلات الدستورية

احب اهنى الشعب المصرى كله و بالأخص أهنى الإخوان المسلمين و الحزب الوطنى
الف مبروك عليكم الشعب الغلبان المصرى أهداكم البلد على طبق من ألماس مش من دهب ولا من فضة
ألف مبروك عليكم التعديلات الدستورية و بعدها مجلس الشعب و بعده رئاسة الجمهورية
نخش فى الجد بقى
أولاً : شباب الثورة بالكامل رافضين التعديلات الدستورية
اومال ايه اللى حصل ؟؟؟
اللى حصل ان الإخوان المسلمين هما و الحزب الوطنى لقيو انها فرصة بالنسبة ليهم انهم يقولوا نعم و دا طبعاً راجع لعددهم الكبير و فلوسهم اللى ما بتخلصش اللى الله اعلم بيجيبوها منين و نظامهم و تريبهم للأمور و تنميقهم للكلام اللى ما نعرفش برضو مين اللى محفظهم الكلام دا كله و دقونهم الجميلة اللى بيضحكو بيها على الناس .
الإخوان المسلمين اللى قالوا للناس الغلابة فى أقاليم مصر اللى عددهم كبير جدا و دا فى مطبوعاتهم اللى وزعوها على كل واحد فى الجمهورية ان اللى يرفض التعديلات يبقى كافر – اللى يرفض التعديلات ليس من الإسلام فى شىء – نعم للإستقرار – نعم للأمن و الأمان – نعم مع الله ..
و كل دا علشان يكسبو انتخابات مجلس الشعب اللى هاتتعمل قريب جداً بعد الفوز بإكتساح لنعم الكلمة اللى بقيت كل ما اسمعها ضغطى يعلى .
و من بعدها رئاسة الجمهورية
و طبعا معاهم بهوات و بشوات الحزب الوطنى و رجال الأعمال
الأيام اللى جاية ملهاش ملامح
بالذات لما ييجى الباشا الكبير عمرو موسى و يمسك رئيس جمهورية
خلاص
الامور بقت واضحة
اتوافق على التعديلات يبقى هايتعمل انتخابات مجلس شعب من بكرا الصبح و أكيد اللى هايكسب الإخوان و الحزب الوطنى و بس
و خصوصاً بعد الإخوان ما أسسو أحزاب جديدة و ما بيقولوش للناس انهم اخوان مسلمين و مش كدا وبس دا كمان دخلوا فى احزاب جديدة من الاحزاب الموجودة .
و كمان الحزب الوطنى اللى بيكسب الانتخابات البرلمانية كل مرة بإكتساح بمنتهى النزاهة و الشرف و خصوصاً بعد ما أسسو حزب 25 يناير برئاسة رجل الأعمال المعروف حسام بيه بدراوى .
و عليه العوض فى أحزاب المعارضة
و عليه العوض فى الثورة كلها

انا عايز بس أفكر الناس بمطالب شباب الثورة
و اللى كان أولها مجلس رئاسى مكون من 4 مدنيين و 1 عسكرى
و ثانيها ان انتخابات مجلس الشعب مش وقتها خالص لان البلد مش جاهزة لانتخابات
و ثالثها الافراج عن جميع المعتقلين السياسيين
و رابعها العمل بدستور جديد و قلنا مليون مرة عندنا دساتير جاهزة زى الفل

عليه العوض فى البلد
الظاهر ان فعلاً مافيش فايدة

[فريد]

لا ياخلود انا مش موافقك
انا كنت من انصار لا للتعديلات
لكن الان بما انها اغلبية فانا نعم
و كده كده فيه دستور جديد
و مش لازم نضع البيض كله فى سلة واحدة
يمكن هما صح واما الاخوان فلا اعتراض لى عليهم
فهم حزب محترم كافح سنين طويلة ضد الحظر
حد هايقولى هما وصلوا للسطلة الان كل فيصيل يسعى اليها
و لماذا هم لا يفعلون وهما على الاقل محترمين منظمين
و متسامحين و عادى انا شخصيا سارشح اى مرشح اخوانى
اما بقى مفيش فايدة دى لا مش عاوز اسمعها تانى
كل شيء سيتغير مع الوقت المهم كلا منا ينجز فى المهام الموكلة اليه
حتى و ان كان مهمتك تراها صغيرة
الان مصر لنا و ستكون بنا
فهيا بنا نعمر مصر عشانا و عشان ولادنا

[قطر الندي]

انا عايز بس أفكر الناس بمطالب شباب الثورة
و اللى كان أولها مجلس رئاسى مكون من 4 مدنيين و 1 عسكرى
و ثانيها ان انتخابات مجلس الشعب مش وقتها خالص لان البلد مش جاهزة لانتخابات
و ثالثها الافراج عن جميع المعتقلين السياسيين
و رابعها العمل بدستور جديد و قلنا مليون مرة عندنا دساتير جاهزة زى الفل

عليه العوض فى البلد
الظاهر ان فعلاً مافيش فايدة

وانا كنت اتمني نفس طلبك ياخلود
وربنا يستر فعلا ولايضيع دم الشهداء
وننتظر قهر وظلم30سنة جاي كمان
موضوع وتحليل في منتهي الروعة
شكرا ياخلود علي ادراكك للاحداث وماسياتي