ليه يا ريس عملت فينا كده

[اميرة حبى انا]

ليه يا ريس عملت فينا كده

(بقلم الإنسان : ممدوح الجيار)

ليه يا ريس عملت فينا كدا
دا احنا كنا فاكرين ان انت واحد مننا
نسيت يا ريس القسم الي قسمته لربنا
انك تحافظ على الوطن وعلينا وعلى ارضنا
بعدت ناس كتيرة شريفه وطيبة بعيد عننا
وجبت ناس حيتان غيلان غرزوا ايديهم فى صدرنا
مانت برضوا يا ريس قبلهم رضيت تمص دمنا
عذبتوا ناس وبهدلتوا ناس وطلعتوا قولتوا قضا ربنا
ليه يا ريس عملت فينا كدا
فلاح عرق وتعب وزرع وحصد من خيرات ارضنا
وانت ياريس مكنتش بترضا تاكل من اكلنا
قلنا طيب يمكن يكون بيقرف مننا
طب ليه يا ريس مانت اجدادك واهلك اهلنا
كانوا ناس طيبين وفلاحين وتعبانين كدا زينا
ليه يا ريس نسيت انك واحد مننا
ليه يا ريس مشوفتش طفل نايم على الرصيف من اهلنا
وشيخ كبير محني ضهره ماشي بيشحت ف وسطنا
وام في عز البرد من غير غطا بتحوط ولادها وتدعي ربنا
محاولتش يا ريس تمد ايدك وتمسح حتى دمعنا
ليه يا ريس عملت فينا كدا
فاكر يا ريس شيخنا الشعرواي قالك ايه عننا
يومها زعلت وبان عليك ومعرفتش انه كان بيحبنا
قالك ساعتها كلام كبير وقال كلام زيه لشعبنا
مفتكرتش يا ريس يومها ان انتا واحد مننا
ليه يا ريس عملت فينا كدا
شوفت يا ريس دم الشهيد على ارضنا
اصعب ما فيه يا ريس انه كان برصاص ناس مننا
رجالتك يا ريس الي جبتهم علشان يحموا ضهرنا
مخفناش يا ريس منهم وفتحنالهم صدرنا
حسيت يا ريس اد ايه غلاوة الوطن عندنا
ليه يا ريس نسيت ان انت واحد مننا
ليه يا ريس عملت فينا كدا
ونسيت يا ريس انك في ارض الكنانه الي حماها ربنا
ورجال زي الاسود على الحدود واقفه بتحمي ارضنا
وفي ساعه الشدة تلقانا نبض واحد كلنا
مانت عارفنا كويس مانت برضو كنت واحد مننا
وشوفتنا وقت الحروب وحب مصر بيجري في دمنا
ميهمناش صوت البارود اصل الشهادة اغلى حاجه عندنا
ليه يا ريس عملت فينا كدا
وشوفت يا ريس ناس طيبه كانت بتبكي عليك في وسطنا
اصلك يا ريس كان ليك معزه كبيره عندنا
وكنت لما تسافر كانوا بيدعوا ربنا يحفظك ترجع لنا
كنت الامل كنت الشعاع الي بينور حياتنا وحلمنا
وقلنا نصبر تلاتين سنه ضاع فيها احلى عمرنا
لكن ياريس بعتنا وفي وسط الزحام والهموم سيبتنا
نستنى لقمه نضيفه وهدمه تستر عرضنا
ليه يا ريس نسيت ان انت واحد مننا
اطفال صغار وشباب كتار وطلبات كتيره محتاجنهم مننا
واحنا غلابه محتارين ومحتاجين ونعمل ايه في رزقنا
وفضلنا نصرخ ونقول كتير لكن ضمير الحكم غايب عننا
وكبروا الولاد وشالوا الهم برضوا زينا
لكن زمانهم كان غير زمانا وقالوا بالعلم حنحقق حلمنا
لازم نغير علشان ما نلحق قبل ما يضيع عمرنا
وكانت الثوره العظيمه ثوره بيضا نضيفه بأيد ولادنا واهلنا
كانت حقيقه مش خيال وبرضوا حاولوا يشوهوها مننا
وشهيد مُصر يموت علشان ما يحيا شعبنا
عرفت ياريس انك السبب في الي حصلنا
بس الزمان يا ريس معدش ينفع يرجع تاني بنا
ليه ياريس نسيت ان انت واحد مننا
وفي النهايه احنا اسفين يا ريس لو حد غلط فيك مننا
مانت ياريس الي بديت تلاتين سنه بعيد عننا
ظلم وقهر وفساد وفلوسنا سافرت من هنا
والله دانا زعلان عليك هتقول ايه لما تقابل ربنا
ويوم القيامه لما كل الشعب منك يطلب حقنا
خلاص ياريس معدش ليك مكان تاني في وسطنا
اسفين يا كابتن اصلك بقيت واحد تاني مش مننا
وصلت الي صاله السفر يتولى بيك ربنا .

تحيه الي شعب تونس العظيم ولكل واحد مصري حر في شعبنا
تحيه حب وشكر وتقدير تمانين مليون نشان على صدرنا
الفتحه على روح الشهيد الي بدمه سجل التاريخ فرحه شعبنا .

[فريد]

حسبنا الله و نعم الوكيل
سوف يحاسب ان شاء الله فى الدنيا
ويوم القيامة اللهم احفظنا
ان كان سيدنا عمر يقول انه سيحاسب عن دابة لم يمهد لها الطريق
فمابلنا بمن جوع و قتل و عذب شعب باكلمه العمر باكمله
وهو كان قادر على ان يحيوا معه حياة كريمة لكن الطمع
ولا حول ولا قوة الا بالله
له الامر من قبل و من بعد
ان الكلامات معبرة لا تحتاج الى كتابة تعليق عليها
شكرا ياستاذة اميرة

[اسامة22]

الله ينور عليك استاذ فريد
اميرة موضوع يستحق ان اقول لكي شكرا
من قلبي
هذا هو الطاغية الذي كثيرا من الشعب الطيب كان لا يعرف حقيقتة
ربنا يحاسبة علي ظلمة للناس نترك حسابة علي الله
ويكفي ان يذكرة التاريخ انة كان اشد من فرعون وهامان وجنودة ظلما وطغيان
اشكرك علي موضوعك

[خلود]

مش عارفه اقول ايه تانى بعد اللى قريته ده

فعلا كلام مش محتاج اى تعليق

ربنا يعنيه لما يقابل ربنا ويساله عن حق الناس دى كلها

شكرا يااميره على نقلك الجميل