طبعا أكيد معانا هنا ف المنتدى أمهات فاضلات اولادهم ضباط شرطه
واكيد بردو في عضوات ازواجهم او اخواتهم ضباط شرطة
ياريت من فضلكم تسمعوني
بقول لك يا أمي يا غاليه
ويا أختي يا حبيبه
دورك مهم قوي قوي الايام الجايه دي
انقلي حضرتك يا امي لابنك
ويا جميلة لزوجك
مشاعر المصريين الطيبين قوي
قولي له دول اهلك وناسك بس اتظلموا كتيييييييير
وانداس على كرامتهم كتييييييير
يمكن مش منك بس للأسف اتحسب عليك عمايل زمايلك
لو حد فيهم جهل عليك اصبر واستحمل
لازم تستحمل عشان بلدنا وعشان القسم اللي اقسمته
ولو ف ايدك قرار محاسبة اي حد من اللي ظلم وخان القسم
اوعى تتردد انك تحاسبه
المحاسبه للفاسد هي اللي هترجع كرامة الشريف
خليكي ف ظهره
قوليله انا عرفه انك راجل وهتقدر بعون الله
قوليله اوعى تفقد اعصابك لو حد استفزك
اللي بيستفزك ده مسكين قوي
وضعيف قوي
بس هو فرحان انه قادر يقول اللي ف نفسه مره
حتى لو كان اللي بيقوله غلط
اعذره
يمكن شايف فيك صورة الضابط اللي هانه زمان ومقدرش ينطق
يمكن شايف فيك صورة الضابط اللي قتل المتظاهرين بدم بارد
يمكن شايف فيك صورة الضابط اللي شافه في فيديو بيعذب سجين
يمكن يمكن يمكن
قوليله
المناظر اللي اتذاعت
والفيديوهات اللي اتشافت
مش بسيطة وانا نفسي بكيت منها
وغضبت وثورت ع اللي فيها
فلاااااازم تعذر
ناس كاتمة غضب سنين جواها
وتستعين بالله وتستخدم ذكائك ف انك تثبت للدنيا كلها
انك شريف
وان الشرطة لسه فيها شرفاء
قوليله صدقني شعبنا طيب قوي
كلمة طيبه تخليه يشيلك ع راسه
ولو تتقي الله ف ناسك
ربنا هو اللي هيدافع عنك

ارجوكي يا امي ارجوكي يا اختي
دورك مهم قوي قوي قوي
ومصر كلها مستنياكي
وربنا يعينك


[IMG][/IMG]