أيــام مبـــارك

يعنى إيه أيام مبارك
يعنى مذلول جوة دارك
يعنى بكرة زى بعده
　والعيال ذلك وعارك
ـــــــــــــــــــــــــــــــــــــــــــ
يعنى تنذل ف كمين
وللا تتهان من أمين
والأمانة وصف كافر
بالعصابة المجرمين
ـــــــــــــــــــــــــــــــــــــــــــ
يعنى حالة من الفساد
كاتمة أنفاس العباد
طبالين حارة العوالم
يبقوا أسياد البلاد
ــــــــــــــــــــــــــــــــــــــــــ
عيشة أسود م الهباب
شعب أرخص م التراب
حتى لو صابر وساكت
برضه واكلاه الكلاب
ـــــــــــــــــــــــــــــــــــــــــ
هى دى يا إخوانا مصر
الفساد عايش فى قصر
والشرف ع الأرض بايت
حلمه لقمة عيش ونصر
ــــــــــــــــــــــــــــــــــــــــ
نصر مايجيش بالأمانى
كلنا لازم نعانى
إصبروا والصبر ساعة
وتنجلى أسمى المعانى
ــــــــــــــــــــــــــــــــــــــــ
العواطف مش عيوب
بس لو هبت حروب
العواطف تبقى عيبة
والميدان غير الجروب
ـــــــــــــــــــــــــــــــــــــــ
طلعت الحداد