اسم الفيلم " يوم الغضب "
العرض : 25 يناير 2011
مكان العرض : في كل مكان في مصر
بطولة و تأليف : شباب مصريين
انتاج : حماس الشباب
اخراج : عقول وقلوب قوية بتحب بلدها
الإيرادات : حرية / عدل / إصلاح / تغيير
التكلفة : دم ابرياء واهااات مصريين



اسف انى قولت انه فيلم لانه حقيقة كاملة عشناها وتعيشناها كلنا
حقيقة كانت الفرحة فيها تمنها دموع عين وايام ارهاق وتعب وناس ماتوا
كانت حقيقة مرة .



بس السؤال هنا ...لأمتى ..؟؟!!
لأمتى هيكون الحرية والعدل تمنها دم وويل ؟؟!
لأمتى كلمة الحق يكون تمنها غالى ؟؟!
لامتى هيكون في ناس تفسد وتظلم ..وناس ملهاش ذنب تدفع التمن ؟؟!
ليه الطمع والجشع والظلم والديكتادورية والكذب والنفاق من الاول ؟؟!



انا كـ شاب مصري طلعت اقول لأ مش علشان مبارك يسقط والسلام
انا قولتها وكتير قالها علشان نعرف لاى مسئول موجود او هايجى
ان للشعب دا ارادة وطاقة
ان الشعب دا مبيرضاش بالظلم
وان الموت اكرملنا مليون مرة من الذل والاهانة

اخر حاجة اقدر اقولها كلمة ...



كلمة للاعلام المصري :
حقيقي تستحق صفر على عشرة وكمان انا كارمك



كلمة لأى مصري ..
ياريت نفكر في اللى كسبناه ونحاول منوصلش نفسينا لمراحل الندم
ياريت منفتحش باب يصعب علينا اغلاقه

ياريت زى ما خدنا حقنا ..منحاولش نجور على حقوق غيرنا الا بالتشريع والقانون الصح
ياريت منخليش اى دولة تلاقي اللى تستغله ضدنا
ياريت نقعد ناخد نفسنا


كلمة لكل انسان فاسد
ان الله يمهل ولا يهمل



كلمة لحكومتنا الجديدة
إذا دعتك قدرتك إلى ظلم الناس فأذكر قدرة الله عليك



كلمة لكل شخص قاصد يخرب
اتقوا يوم ترجعون فيه الى الله



كلمة لرئيس الجمهورية
زى ما انت مرضتش تهرب وتسيب مصر تخرب ..احنا كمان عايزينك فيها
بس بعدل .. وحق .. وحرية
مش بالظلم .. والكبت .. والديكتادورية