تحملت التعب لاجلك وانا حملي يهد جبال
رحلت من العذاب .. وماوقفت الا على جالك
علامك.. كل ما اجيك متواضع جيتني تختــال
معاك اليا متى باصبر .. وصبري معك يحلى لك
مثل ما اقبلت لعيونك لزوم تلدلي باقبــــال
ومثل ماقد حشمتك , حس واحشم قلبي اشوالك
انا ماحدٍ بجابرني أساير معك هالمنوال
ترى لاني تبيع لك .. ولاني باصغر عيالك
انا جيت اعشقك نبض ومشاعر , مااعشقك تمثال
انا جيت اسكنك واحياك وابقى فيك , وابقى لك
انا جيت بظما عاشق تعب يطرد سراب اللال
انا جيت استفز رضاك ..من فرقاك والجالك
انا ماهمت بك عاقل انا كنت اعشقك بخبال
انا ماكنت احبك حي .. انا كنت اعشقك ..هالِك
تخيل من كثر ما اخاف تلقى للزعل مدخال
اخاف اخطي على طيفك وادوس برجلي ظلالك
تبعتك .. والعرب تتبع رعود البارق الهمال
وانا شفت المطر .. يتبعك في حلك وترحالك
كأن اللي خلق حسنك خلقني مع جسدك ظلال
وصرت اقرب جسد يمشي معك بقفاك واقبالك
ابي قلبك يحس انه فقد بمحبته رجــــال
ملكته من هدب عين .. وخسرت رضاه باهمالك
صحيح ان الفراق اقسى.. ولكن الوصل محال
وانا صعب علي ارضي غرورك .. واضعف قبالك
بعد ماحققت عيني فبعدك للرقاد آمال
أعود للسهر ؟ ياخوي فال الله ولا فالك
ببدل نظرتك فيني .. واجي لك كل يوم بحال
بكون اقرب من ثيابك عليك .. ولا اتهيالك
بلمّك , و انثرك , و اجمعك , وارجع وانثرك باهمال
بخونك , و ازعلك , وارضيك , وازعل منك وارضى لك
ابرسم بالثرى وجهك .. وابدفن صورتك برمال
ابشكي للعرب فرقاك .. واضحك عند عذالك
ابهديك الوصال فراق .. واهديك الفراق وصال !
بسوي مثل ماشوفك تسوي .. وافعل افعالك
عشان تعرف من فينا الزعول .. ومن وسيع البال
ابيك تذوق فنجالي .. وانا بذوق فنجالك
نصيحة احتفظ فيها قصر معك .. الزمن أو طال
أبي تسمع كلامي زين .. وتحطه عـــلى بالك ..
اذا حبك هبال أطفال .. لك عندي هبال أطفال
ولا .. وابشر بعد بهبال حب ماهو بهـــبالك
و اذا قصدك تهين اســـمي عشان تشمت العذال
حشى لا انتَ ولا غيرك .. ولا عشرة من اشكالك
-- أنــآ جيـ/ــت أعشــّّــقكـ.. نبــ..ــض ومشــآإآعـــر مــآ اعشــقكـ .. "تمثـــآل" ..
المفضلات