فن الردح

مساءالخير
زى ما كل حاجه شعبيه فى مصر والعالم بتنقرض زى ما اللغات المحليه والملابس والفنون التقليديه فى كل مكان فى العالم بتختفى حاجه ورا التانيه لحساب العولمه اللى هتخلى كل حاجه فى حياتنا كبشرفى اى مكان فى الدنيا شبه بعضها.

المزيكا فى اليابان هتبقى زى المزيكا فى اسبانيا والملابس فى ادغال افريقيا هتبقى زى الملابس فى أسترالياو الصين .
جدتى كانت بتقول أمثال كتير أووووى أكتر بكتير من أمى وانا بقول أمثال اقل بكتيرمن أمى وبأذن الله لو فضلنا ماشيين على الحال دا الأمثال الشعبيه هتنقرض وهيطلعوا ولادى معندهومش أى فكرة عنها.

جدى كان بيلبس جلابيه وابويا لبسها وهو صغيرولما كبر لبس قميص وبنطلون وانا عمرى ما لبستها ولا أولادى هيسمعوا عنها.

واللى هيمشى على الامثال الشعبيه والجلابيه هيمشى على كل الفنون والثقافات والمعارف والتقاليد والعادات لان العولمه ببساطه هى فرمطه للهارد درايف بتاع الأم والشعوب وبما أن الموضوع المرة دى عن السفاله وقله الأدب أحب أفكركم بفن جميل جداً راح فى الرجلين زى ما حاجات كتير راحت هو فن الردح.

الردح : هو مباراه فى الأرتجال والشعر والوزن الموسيقى ومنافسه تطويع اللغه ومعركه حاميه للسيطرة على المسرح بين أتنين ستات.
والمسرح بتاع أى حارة شعبيه منقرضه الست تقف فى البلكونه أو فوق السطوح وغريمتها أو منافستها تقف فى البلكونه المقابله أو على السطوح المقابل وتبدأ المعركه.

أم فهيم تقول/// دلقتى مايه على الغسيل ليه يا وسخه يالى العشرة منك بقرش .
أم فاروق ترد عليها وتقول /// مايه حمامنا أنضف من دمك يا واطيه يا فشه يامو كرش .

أم فهيم ميخلصهاش تقوم تفتح بحر جديد من بحور الشعرالشوارعى المصرى وتقول.
انا فشه يا أولحه ياسوده ياكودا يالى ممصلحين بيكى الفرن.

ممصلحين بيكى الفرن؟ يعنى ماسحين بيكى الفرن
فوراً ترد عليها أم فاروق وتقول///
أحسن منك يارمامه يالى رجاله البلد__________ فى الفرن
شوفتوا الشعرماشى ازاى!!وشايفين الوزنه للكلمات.المسأله مش بتبقى ديالوج بين الأتنين زى ما بدأت المعركه بتدخلها أطراف تانيه. وكل اللى عنده وصله أبداعيه زى اللى فاتت وأسفل منها بيقولها والمسرحيه الشعبيه لما بتكتمل بتبقى أقرب للسنفونيه السنفونيه اللى كل عازف فيها عارف هيدخل امتى ويخرج أمتى من خلال النوته اللى ماشى عليها .
فى حاله من التردد للخصوم وهما بيأدو وصلتهم وهما على المسرح الشعبى
بمعنى ميصحش أم فاروق تقاطع أم فهيم وهى فى نصف الجمله بالعكس دى لازم تسمعها وتركز معها كويس أوى لانها هتستلم منها المايك ولازم ترد عليها خلال ثانيه واحده بجمله لها نفس الوزن ونفس السلم الموسيقى والا تبقى خسرت المعركه .

ولما السنفونيه دى كلها بتشتغل السيستم دا بيحافظ على أحترامه ولوحصلت فيه شويه فوضى المأديات الرئيسيات بيستعيدوا السيطرة مرة تانيه ويرجعوا كل حاجه لنظامها المحترم مهم أوى أن نفتكر أن الستات فى الحاله دى بيبتدو بالتدريج والأمثله اللى انا قولتها من شويه مجرد أفتتاحيه لزوم التسخين بس بعد ما الجو بيسخن الستات بيفرشوا الملايه.
وفرش الملايه معناه/// تخلى جزئى عن الحياء واللى معناه أن مستوى الشتيمه هينحدر كمان شويه لان الست فى المناطق الشعبيه اللى تسمح ان مناطق من صدرها وذراعها يبانوا من قميص عضه اللفاندى تبقى ست من الجرآ والبجاحه أنها تسمع اى خصم ليها من المنقى خيار وبعد مرحله فرش الملايه تيجى مرحله فك الشعر .
دايماً بيجى فى أطار قسم يعنى حلفان أن الشعر دا عمرة ما أنفرد على كتف راجل الا فى الحلال أو قسم الست فيه بتمسك شعرها وتقول أحلق مقصوصى لو معملتش فيكى كذا وكذا وكذا يابنت كذا وكذا وكذا أبقى كذا.

بس فك الشعر الهدف منه هو التخلى عن جزء تانى من الحياء علشان المنقى خيار هيبقى بعد شويه المنقى أتا وكمان فك الشعر وسط الردح كان بيبقى تمهيد للتشابك باليد لان شد الشعر أصول الخناق بين الشعبيات وغير الشعبيات والتخلى عن الحياء ممكن يمتد فى حالات محدوده جداً لأكتر من أظهار الدراعات وفك الشعر

كان بيحصل فى حالات أن الست كانت بتستعرض أمام غريمتها أجزاء من مفاتنها وممكن مفاتنها الداخليه من باب أنها تغيظها وتقولها انها أحلى منها .
يمكن علماء الحضارة والأنسانيات قدروا يجمعوا شويه من الأمثال الشعبيه أو الأغانى الشعبيه أو الرسوم الشعبيه قبل ما تندثر بس فن الردح المسجل منه نادر جداً جداً جداً وعلى حد علمى لم يخضع لدراسات محترمه لحد دلوقتى بس خلينا نعتبر الموضوع اللى بقوله دا نداء لكل شخص فاكر واصله كامله أو عنده تسجيل لوصله كامله من وصلات الردح أنوا يجبهالنا ويسمعنا فن الردح على أصوله ..