بسم الله الرحمن الرحيم
السلام عليكم ورحمة الله وبركاتة .,


((سامحوني باللهجة العامية المرادي ))


هو لو انا قولتلكم اني بخاف ... نظرتكم ليا هتبقا وحشة ...فيه ناس هتقول ايه
الراجل ده الي بيعلن انه خايف ...ده ميصحش يتقال من لسان راجل ..!!!


طيب ايه رائيكم بقا اني انا خايف ..!!!



خايف اتخرج بعد تعب ومزاكرة وسهر سنين وايام وملقيش مكان ولا شغل ولو لقيت
يادووب مرتبي يخليني اعيش لوحدي بدون زوجة او اولاد

اه انا خايف ..!!!

خايف اتقدم لبنت اتجوزها مقدرش اواجه متطلبات اهلها الكتيرة جدا الي هما نفسهم
لو عندهم شاب ولد هيخافو انه يتعرض لنفس المتطلبات دي لو اتقدم للجواز ...

اه انا خايف ..!!!

خايف لو اتجوزت وخلفت اولاد ميلقوش مكان كويس يتعلمو فيه ويلاقو الفصل 60 طالب
ومستوي تعليم زي الزفت حشو عقول ومواد بتتنسي بعد الامتحان بيوم ..

اه انا خايف ...!!!

خايف لو قدرت اوفر لاولادي تعليم كويس مقدرش اوفر ليهم سكن كويس وحياة كريمة


اه انا خايف ...!!!

خايف اربي اولادي عل الخير والشرف والكرامة والحق والعدل ويخرجو لدنيا ميعيش فيها
الا القوي المادي العقلاني في زمن الوسطة والمحسوبية والفساد

اه انا خايف ...!!!

خايف اقوم بعبادات ربنا وسنن رسولي انا وزوجتي واصاحب اتقياء الناس فيقولو عليا متطرف وارهابي وادخل في "البلاك ليست "

اه انا خايف ..!!!

خايف امشي جنب الحيط يقولو جبان او امشي وسط الطريق يقولو مجنون وبتاع مشاكل
او امشي علي الرصيف ملقيش رصيف فاضي من الناس الي نايمة علية ..!!

اه انا خايف ...!!!!

خايف بكره صوتي يكون له ثمن ويا اقبل الثمن يا اما يتفرض عليا اقول صوتي للقوي
وصاحب النفوذ .

اه انا خايف ...!!!

خايف اصحا من النوم ملقيش مصر ... خايف تقرف وتزهق من الي اولادها عملوه فيها
خايف تلم عزالها وحالها و محتالها وتسيبنا وتمشي وتقول والله ما انا راجعة ليكم تاني


خايف اقوم من النوم ملقيش مصر ...!!!!


لو حد مفهمش كلامي ...يبقا مش مصري ... اسف بس انا خايف ..!!!

:eh_s(2):