لأ لأ لأ تعرفي الست بكعب جزمتها وشنطتهـ طبعا !!!!

بس؟؟؟ طب والراجل؟

الراجل ببساطة ضوافره وياقة قميصه تقول لك هو مين !!!!

بس؟؟؟؟


الست دي بلدي قوي .. إيه موسم العبايات اللي هي عايشة فيه ده

الجارة دي فلجر قوي.. صوتها دايما طالع صبح وليل

الراجل ده متصنع قوي
ده نتن يا شيخة .. شوفيه وهو نازل يشتري حاجة بترننج وشبشب حمام

سبحان الله مليونيرة وماسكة شنطة مقطعة .. ناس ميتة على الدنيا

مش عاجبك الكلام؟ ولا مش عاجبك أوصاف اللي بيتوصفوا؟

تعالى لوجه الصورة الأخر

ملك ولا كتابة؟

//
- إيه يا طنط الشنطة اللي انتي ماسكاها دي؟ استحالة
- حركة كتف معناها طظ فيكم ..
معندكيش واحدة عدلة من اللي بتشحتيهم يا مفترية على النعمة؟
- ينهار أبيض .. ها تاخدي شنط بشحتها ليه؟ ده إنتي مليونيرة
- ياغبية فيه ناس أحق بالقرش اللي بيتصرف ده .. فيه ناس مش لاقية تاكل
- وماله .. ولا تنسى نصيبك من الدنيا .. إعملي اللي بيرتاح ضميرك بيه وبرضه بهججي نفسك وإنعشيها
- أنعشها؟ ها أعيش أكتر ما عشت؟ .. ها أشتري أكتر ما أشتريت؟ .. ها ألبس إيه أكتر ما لبست؟
يابنتي لو قعدتم تشتروا وتلبسوا وتمدوا رجلكم شمال ويمين ولا ها تشوفوا ذرة من المتع اللي انا خلاص شبعت منها

//

- إيه يابني الترننج ماركة معارك أكتوبر ده والشبشب اللي انت نازل به دهون؟
- أنا نازل السوبر ماركت صد رد
- ولو .. برضه .. مش منظر
- ليه؟ مش منظر ليه؟ ومين قال إن المنظر بيقول أنا مين؟
ومين قال إني في عمري ده لسه يلزمني رأي الناس فيا؟
واللي "وأنا في العمر ده" لسه ها يحكم علي من المنظر ولسه ميعرفنيش تفتكري عيني بتشوفه أساسا؟

//

- مجيش مرة إلا وأسمع صوتك سوبرانو من قبل ما أرن الجرس
- أعمل إيه يعني .. واحدة مسئولة عن أربع شياطين حمر وأبوهم راح يعيش شبابه وفر وسابهم حسبي الله ونعم الوكيل
- بس صورتك أمام الناس وصحتك وأعضاءك الداخلية ..
ده غير نفسيتك وجمال بشرتك .. عجزتي بدري
- بصي أنا خلاص حددت أولوياتي
الجيران ربنا معاهم وهم مالهم ومالي اللي عنده مصيبتي ها تلاقي صوته من نفس طبقة صوتي
أما عن صحتي وبشرتي فدول في داهية ..
المهم أسيطر على الوضع اللي أنا فيه
واللي مش عاجبه حطيه مكاني يومين واتفرجي عليه
الكلام سهل قوي والإنتقاد شغلة الفاضي ..
التجربة هي الفيصل بيني وبين الناس
المهم ولادي مجموعة السوات اللي أُبتليت بيهم ربنا يخليهم ويصلحهم
لو وصلت بيهم لبر الأمان تبقى الدنيا إدتني كل اللي حلمت بيه وداوت جراحي فعلا

//

وهنا تلاقي نفسك أمام وجهين لصورة واحدة
والمشكلة إنت عينك بتشوف اي وجه للعملة؟

ناس مظهرية جدا .. عودوا عينهم على أن تكون كاميرا تلتقط نقائص الناس
أو ما يتصوروا هم أنها نقائص
من وجه الصورة هي نقائص
لو قلبت العملة يمكن تلاقيها كرامات وصبر على المكاره وباب من أبواب الجنة

ناس عجيبة جدا مفترسين وملهمش فعلا صفة الإنسان الرحيم
إستحالة تتصور وجودهم إلا في مسلسلات عمو عزيز القديمة المملة
مجرد المرور في محيطهم بيصيبك بحالة قرف صعب ليمونة واحدة تكسر حدتها

وناس شافت هموم كتير في الدنيا
ومع العز والترف لم تجد حظ وافر من السعادة والإستقرار
رأيي الشخصي أنهم بشر - مع عطائهم الملموس - لم يُوفقوا لعشرة بشر طيبين
مع الوقت وتقدم السن فهموا أن ما عند ربك خير وأبقى
تقريبا مش فاضل لهم من متاع الدنيا غير القيام بمهام ملقاه على عاتقهم
سواء لأسرهم أو لبشر غرباء "قريبين" يعتمدوا على حبهم للخير
أما المال الذي جعله الله في أيديهم ولم يُمكن منه قلوبهم فهو في حجمه الطبيعي
سبب لقضاء الحوائج والحياة بكرامة بلا مذلة

الدنيا أصبحت بالنسبة لهم
ملبس مريح .. مجرد مريح .. مش مهم جنبه أي حاجة تانية
أكلة مريحة .. أيوة مريحة ..
مبهجة لو معدتهم لسه تهضمها أو مجرد طعام يقيموا به أودهم لو معدتهم متقدرش

نومة مريحة .. مجرد مريحة ..
مش مهم الحجرة نفسها من المناصرة ولا من قاصد كريم
وهكذا

ببساطة هم يعيشون حياتهم بنظرية المريح اللطيف
اللي يعدي الأيام
اللي يسعدهم ويحقق استقرارهم النفسي
وطظ في الكاميرات

ممكن لو شفت ناس
وعينك كانت كاميرا
تصبر شوية قبل ما تدمغهم بما ليس فيهم

مش لازم يكونوا بخلاء
مش اساسي يكونوا ميتين على الدنيا

ممكن ببساطة يكونوا زاهدين
ممكن يكونوا بيدوا الدنيا قدرها بالسنتي والمللي

” لو كانت الدنيا تعدل عند الله جناح بعوضة ما سقى كافراً منها شربة ماء “

ممكن يكونوا أحسن مني منك ومن كل من عاشرنا عشرين مرة
وأساسي بيكونوا ولا يهمهم الكاميرات
المسماة مجازا بعيون البني أدمين

إنتهـــى ..~