طهقانة و طهقان

**قمر** · 31-05-2009, 12:29 AM

طهقانة

لاحظت الفترة الأخيرة على طهقان انه بقى قليل الكلام قليل الأكل كثير النوم ،
و بما إني قارئة في مجال الطب النفسي ،خفت يكون عنده اكتئاب ،
يا نهار ابيض في واحد متجوز ست فيري انترستنج زيي و يجيله اكتئاب !!!
دي حتى تبقى عيبة في حقي.
فقررت إني أخرجه من الحالة دي بعون الله
...
طهقانة: ايه رأيك يا طوطو.. ما تيجي ننزل نتمشى شوية حولين سور الحديقة الدولية؟
رياضة يعني

طهقان: (هز رأسه رافضا) توء

طهقانة: طيب تعالى نروح المول اللي جنبنا نتفرج على المحلات
و أعزمك على اتنين كابتشينو على حسابك؟؟

طهقان: (يتململ في جلسته) لأ

طهقانة: شفت مدام هدى جارتنا اشترت بغبغان إنما سكر خالص ،
من النوع اللي بيتكلم ،بس يا حرام أول ما جابته ماكنش راضي يتكلم
بقت تحط له فلفل حراق ،و من ساعتها مبطلش كلام هاهاها

طهقان: (أخد نفس عميق و زفير قوي) اه

طهقانة: القطة بتاعة مدام ماجدة كانت حامل و خلفت خمس قطط و...

و...
طهقان: (بصوت مرتفع) إفصلي بقى يا شيخة... دي التلاجة بتفصل!0

طهقانة: الله... حمدلة على السلامة ايوة كده صوتك وحشني يا طوطو.. ده أنا كنت خايفة تكون بلعت لسانك و مكسوف تقولي ،بمناسبة التلاجة.. سهام صاحبتي اشترت تلاجة ا ل - جي أربعة و عشرين قدم من السوق الحرة و دفعت بالدولار تصور!!0

قام طهقان و سابني قاعدة و اتجه إلى غرفة النوم ، و أنا وراه ...اسيبه يعني و لا اية؟

طهقانة: انت حتنام تاني و لا اية؟ ما تيجي اشغلك الفيلم اللي بتحبه فيديو و .. و.
..
طهقان: يا طه طه ارحميني بقى ..أنت عاملة زي مكنة الفيشار بس انتي مكنة كلام !!!اسكتي شوية ..أقولك؟..روحي نامي
و قفل باب الغرفة و قال من ورا الباب

طهقان: انا حنام محدش يصحيني

طيب أنا زعلانة بقى و مقموصة ، ده جزائي اني عايزة أخرجه من دور الاكتئاب اللي

عنده

و فكرت شوية.. لاقيت ان نصف الأزواج بيجيلهم الدور ده في مرحلة من مراحل الزواج ، و بنسميها إحنا دكاترة الجواز بالـ ( سكتة الزوجية)0

طيب دي علاجها اية ؟؟
همممم
فكرة كويسة....
سبت طهقان ينام و دخلت المطبخ عملت الغدا ، صينية خضار تورلي عجب و للي ميعرفش التورلي هو الخضار المشكل.
وعملت رز بالشعرية و شوربة و وضبت السفرة و دخلت صحيت سي طوطو يتغدى
قعد مكشر على السفرة ،و قبل ما نبدأ الأكل اتصل بيه صلاح صاحبه

طهقان: انفرجت أساريره (محدش يسئل اساريره دي فين) الو ...هاهاها أهلا أهلا ...آه كنت نايم شوية...يا راجل ..إمتى؟؟...طيب. . نتقابل و نشوف الماتش سوا بقى..... هاهاهاها ... اه و....و ...

شاهدين يا ناس الراجل بيتكلم بربند مع أصحابه و بيضحك و صوته جايب آخر الشارع و مع مراته حبيبته.. النسمة.. الوديعة اللي هي أنا عامل فيها جهاز تلغراف و بيرد بالمختصر اللي مش مفيد كمان
طيب لما نشوف أخرتها
خلص التليفون و بدا طهقان الأكل، و يادوب حط أول معلقة تورلي في بقه و بصيت لقيته عرق و مناخيره ساحت

طهقانة: مالك يا طوطو؟

طهقان: ايه ده الأكل حامي كده ليه؟؟

طهقانة: بجد؟؟ أصلي حطيت قرن فلفل حراق في التورلي

طهقان: (أخد الملعقة التانية) لا لا... ده حراق قوي!!0

طهقانة: كويس انا سمعت إن الفلفل الحامي بيموت الميكروبات

طهقان

أخد المعلقة التالتة) أنتي متأكده انه قرن فلفل واحد؟؟ ده تقريبا نص كيلو فلفل شطة !!0

طهقانة: طيب كل بالهنا والشفا

و نجحت خطة مدام هدى مع البغبغان ..الفلفل الحراق جاب نتيجة هايلة، طهقان طول الوقت عمال يتكلم من ساعة ما أكل صينية التورلي ، و مش بس كده و رايح جاي على الحمام ، و معرفش ينزل يشوف الماتش مع صاحبه صلاح و بكده ضربت عصفورين بحجر واحد
نياهاهاي (ضحكة شريرة)0
اعمل اية بس ؟! ما أنا خلاص طهقت من طهقان و عمايله و صمته الرهيب اللي غلب صمت أبو الهول و كان لابد من حل لوزعي لزحلقة الكلام من بقه
و لا إية؟
اوروفوار

إمضاء طهقانة

عجبتني اوي اوي يلا عشان نجربها بقي
اتعلموا يابنات

**اميرة حبى انا** · 31-05-2009, 02:55 AM

ههههههههههههههههههههه
هههههههههههههههههههه
ههههههههههههههه
هههههههههه
ههههههه
هههه
هه
ه

**دعاء الكروان** · 31-05-2009, 08:36 AM

جميلة جدا يا قمر
تسلم ايدك

**fagrmasr01** · 31-05-2009, 11:01 AM

ههههههههههههههههههه
فعلا .. دى مش طهقانة وبس .. دى تطهق الى مايطهقش
ليه حق يكون طهقان وستة وستين طهقان كمان

حلوة اوووى
تسلم ايديكى يا قمرنا المنور